Президент имзолаган қонун билан фойдали қазилмаларни рухсатномасиз қазиб олиш ҳуқуқбузарлигини такроран содир этганлик учун жиноий жавобгарлик белгиланди, дебхабар бермоқда Адлия вазирлиги.
Амалдаги қонунчиликка кўра (МЖТК 70−2-моддаси), фойдали қазилмаларни рухсатномасиз қазиб олиш фуқароларга БҲМнинг 30 дан 50 бараваригача, мансабдор шахсларга эса — 50 дан 100 бараваригача миқдорда жарима солишга сабаб бўлади.
Шу ҳуқуқбузарлик маъмурий чора қўллангандан сўнг бир йил давомида такрорланса, уни содир этишда фойдаланилган ашё мусодора қилинади ва фуқароларга БҲМнинг 50−70, мансабдорларга 100−150 бараваригача жарима солинади.
Янги ҳужжатга кўра эса, жиноят кодексига фойдали қазилмаларни қонунга хилоф равишда қазиб олишни шундай ҳаракатлар учун маъмурий жазо қўлланганидан кейин такрор содир этганлик учун, шунингдек, фойдали қазилмаларни олтин изловчилар усулида рухсатномасиз қазиб олганлик учун жиноий жавобгарликни назарда тутувчи қўшимчалар киритилмоқда.
Бундан ташқари, МЖТКга ер участкаларини ўзбошимчалик билан эгаллаб олиш, ўзбошимчалик билан эгаллаб олинган ер участкаларида қурилиш ишларини амалга ошириш, шунингдек, ер бериш тартибини бузиш билан боғлиқ ҳуқуқбузарликларни содир этган шахсларга нисбатан маъмурий баённома тузиш юзасидан ички ишлар органларига зарур ваколатлар берилишини назарда тутувчи ўзгартиришлар киритилмоқда.
