28 октябрь куни кечқурун Тбилисидаги Руставели шоҳкўчасида Грузия парламенти сайловлари якунларига қарши норозилик намойиши бўлиб ўтди.
Бунинг оқибатида шоҳкўча бир муддат ёпилган. Хавфсизлик кучлари парламентга туташ кўчаларда йиғилган. Paper Kartuli маълумотларига кўра, акцияга 300 га яқин одам келган. Ташкилотчиларга кичикроқ саҳна ўрнатишга рухсат берилган.
Шунингдек, Венгрия бош вазири Виктор Орбан кечқурун Тбилисига етиб келган. Руставели проспектидан Венгрия байроқлари туширилган бир неча машина ўтган. Намойиш иштирокчилари уларга ҳуштак чалган. Бош вазир мазкур шоҳкўчада жойлашган «Марриотт» меҳмонхонасида тунаган.
Грузия президенти Саломе Зурабишвили ҳам норозилик акциясига қўшилган. У аввалроқ парламент сайлови натижаларини тан олмаслигини айтиб, тарафдорларни митингларга чиқишга чақирганди.
Президент ўз нутқида халқаро етакчилар билан гаплашганини айтди. Зурабишвилининг сўзларига кўра, унинг суҳбатдошлари сайлов натижаларини тан олмаганликларини билдирган.
Фото: Publika
«Биз сизнинг конституциявий овоз бериш ҳуқуқингизни ҳимоя қилиш учун курашамиз. Ҳозир пессимизмнинг вақти эмас, ҳозир хотиржамликда бошни кўтариб ўз овозингизни ҳимоя қилиш муҳим», — деди президент.
«Новая газета Европа» ва «Дождь»нинг ёзишича, акция якунида иштирокчилар Европа Иттифоқи ва Грузия мадҳияларини ижро этган. Шундан сўнг намойишнинг тугаши саҳнадан эълон қилинган ва намойишчилар тарқала бошлаган.
Акцияда асосий талаб халқаро ташкилотлар кузатуви остида янги сайловлар ўтказиш бўлди. Шу билан бирга, янги парламент ишига бойкот сақланиб қолмоқда, деб ёзади блогер Николай Левшиц.
Митинг тинч ўтган, ҳеч ким ҳибсга олинмаган.
Грузияда парламент сайловлари 26 октябрь куни бўлиб ўтди. МСК маълумотларига кўра, ҳукмрон «Грузин орзуси» партияси 53,9 фоиз овоз ва парламентда кўпчиликни қўлга киритди. Халқаро кузатувчилар овоз бериш қоидабузарликлар билан ўтганини таъкидлади. Сайловдан сўнг тўртта асосий мухолифат блоки вакиллари янги парламентни бойкот қилишларини эълон қилди.
