Октябрь ойида Марказий банк томонидан белгиланган АҚШ долларининг сўмга нисбатан курси 0,46 фоизга ёки деярли 59 сўмга — 12 715,42 сўмдан 12 774,34 сўмга ошди. Бу ҳақда «Газета.uz» ўрганган Марказий банк маълумотларидан келиб чиқади.
Октябрда Тошкент валюта биржасидаги савдолар ҳажми сентабрга нисбатан 12,2 фоиз ошди — 3,02 миллиарддан 3,39 миллиард долларгача.
Агар сентябрь ойи охирида банклар долларни 12655−12700 сўм оралиғида сотиб олиб, аҳолига 12720−12775 сўмдан сотган бўлса, октябрь ойи охирида харид курси 12715−12760 сўмни, сотиш курси эса — 127780−12835 сўмни ташкил қилди.
Август ойида миллий валюта 0,67 фоизга (+83,97 сўм), сентябрда эса — 90 сўмга (+0,71 фоиз) девальвацияга учради. Шу билан бирга, июлда сўм долларга нисбатан 0,11 фоизга (-14,12 сўм), июнда эса — 0,51 фоизга (-64,67 сўм) мустаҳкамланди.
Эслатиб ўтамиз, учинчи чоракда (июль-сентябрь) Марказий банк маҳаллий ишлаб чиқарувчилардан олтин сотиб олиш нархини 12 фоизга оширганди. Шу билан бирга, валюта интервенцияларининг соф ҳажми қарийб 3 баравар — 20,3 триллион сўмдан 6,9 триллион сўмга қисқарди.
«Интервенциялар ҳажмининг нисбатан пастлиги иқтисодиётга мавсумий аҳамиятга эга бўлган хорижий валютанинг юқори оқими шароитида ички валюта бозорида етарли таклифнинг шакллангани билан изоҳланади», — таъкидлади регулятор.
2023 йил октябрь ойида АҚШ валютаси курси 0,36 фоиз (+44,16 сўм), ўтган йилнинг январь-октябрь ойларида эса 8,8 фоизлик (+993,77 сўм) ўсиш кўрсатганди.
10 ой якунига кўра сўм атиги 3,5 фоизга — 12338,77 сўмдан 12774,34 сўмга (+435,57 сўм) қадрсизланди. Таққослаш учун: 2023 йилнинг шу даврида девальвация 8,4 фоизни (-949,61 сўм) ташкил қилган эди.
Эслатиб ўтамиз, аввалроқ иқтисодчи Миркомил Холбоев Ўзбекистон миллий валютаси девальвацияси сабабларини таҳлил қилган эди.
