АҚШ Молия вазирлигининг Хорижий активларни назорат қилиш бошқармаси (OFAC) Россия Федерацияси ҳарбий-саноат комплексини ривожлантириш билан боғлиқ 275 га яқин шахс ва ташкилотларга нисбатан санкциялар киритди. Бу ҳақда Spot хабар қилди.
SDN-рўйхатга 400 га яқин жисмоний ва юридик шахслар, шу жумладан, Россия мудофаа вазирининг беш нафар ўринбосари киритилган. Шунингдек, «Росатом Рақамли ечимлар» ва «Росатом Микроэлектроника,» шина ишлаб чиқарувчи «Кордиант,» «Чип ва Дип» компанияси, «Трансмашхолдинг» бош директори Кирилл Липа ва Москва авиация институти ҳам чекловларга учради.
Бундан ташқари, санкциялар Хитой, Швейсария, Туркия, БАА, Ҳиндистон ва бошқа мамлакатларнинг чет эл фуқаролари ва юридик шахсларига ҳам таъсир кўрсатди.
АҚШ Молия вазирлиги Ўзбекистондаги иккита компания — Uzstanex ва The Elite Investment Group`ни санкциялар рўйхатига киритди.
Корхоналар ва ташкилотларнинг ягона давлат регистрига кўра, Uzstanex 2018 йил июль ойида рўйхатдан ўтган ва «механик дастгоҳларнинг улгуржи савдоси» билан шуғулланади. Тошкент шаҳрининг Яшнобод туманида жойлашган компаниянинг устав фонди 65 млн сўмни ташкил этади. Фирманинг ягона таъсисчиси — Абрамов Василий Виталевич, унинг директори — Бойсов Дмитрий Александрович.
The Elite Investment Group 2024 йил январь ойида «улгуржи номутахассис савдо» учун ташкил этилган. Устав фонди 3 млн сўм бўлган компания Тошкент вилоятининг Янгийўл туманида жойлашган. Унинг асосчиси ва директори — Казакбаева Нодира Абдусатторовна.
АҚШ Давлат департаментининг маълум қилишича, The Elite Investment Group 2024 йилнинг март ойидан май ойига қадар Россия компанияларига, шу жумладан, АҚШда рўйхатдан ўтган ва Россияда жойлашган GTS Group компаниясига юқори устуворликдаги товарларнинг умумий рўйхатидан (CHPL) тахминан 190 минг долларлик маҳсулотлар, шу жумладан, Туркиянинг Guclu Global компаниясидан агент-ташувчи сифатида фойдаланган ҳолда электр трансформаторларини етказиб берган.
2023 йил ноябрь ойида АҚШ Ўзбекистондан Mvizion компаниясига қарши санкциялар киритган эди. АҚШ Савдо вазирлиги маълумотларига кўра, у Россия армияси учун дронлар ишлаб чиқариш билан боғлиқлиги аниқланган.
Февраль ойи охирида АҚШ Молия вазирлиги санкциялар рўйхатини яна бир бор тўлдирганини эълон қилганди. Улар орасида пойтахтда жойлашган Polar Star Logistics транспорт компанияси, шунингдек, Ўзбекистон фуқароси — Россия кичик энергетика ассоциацияси президенти ва БААдаги «Бизнес Россия» савдо уйи директори Максим Загорнов бор.
