Марказий банк раиси Мамаризо Нурмуратов 31 октябрь куни бўлиб ўтган матбуот анжуманида валюта курси ва олтин нархидаги ўзгаришларнинг инфляцияга таъсири бўйича саволга жавоб берди.
«Биз валюта курси ўзгаришининг инфляцияга таъсирини, албатта, ўрганамиз. Бизнинг охирги ҳисоб-китобларимиз бўйича, валюта курсининг 1 фоизга қадрсизланиши инфляцияга 0,3−0,4 фоиз пункти даражасида таъсир қилиши мумкин», — деди Марказий банк раиси.
Мамаризо Нурмуратовга кўра, регулятор 2025 йилда олтин нархининг кескин пасайишини кутмаяпти.
«Бевосита олтин нархига келсак, олтин нархи ва инфляцияни бевосита боғлаш деган жойимиз йўқ. Лекин олтиндан тушадиган валюта маблағларини ички бозорда сотишнинг валюта курсига, албатта, таъсири бўлади. Келгуси йилда олтин нархи ҳозиргидан қисман пасайишини кутяпмиз. Лекин кескин пасайишни кутаётганимиз йўқ», — деди у.
2024 йилда олтин котировкалари унцияси учун 2004 дан 2762,8 долларгача ошди (+37,9 фоиз).
Скриншот: Investing.com
