Ўзбекистон президенти Шавкат Мирзиёев Навоий шаҳрида ўтказган йиғилишида якшанба куни бўлиб ўтган Олий Мажлис Қонунчилик палатаси ва маҳаллий Кенгашларга сайлов якунлари ҳақида гапирди. Давлат раҳбари матбуот котиби Шерзод Асадов унинг иқтибосларини келтирмоқда.
«Ушбу сайлов Янги Ўзбекистонни барпо этиш йўлида амалга ошираётган туб ислоҳотлар самарасини ўзида яққол акс эттирди, демократик тараққиётимизнинг ёрқин ифодаси сифатида ҳаётимизда ўчмас из қолдирди, деди президент.
У Ўзбекистон фуқароларига юксак сиёсий маданияти ва фаоллиги, шунингдек, фуқаролик бурчини масъулият билан бажараётгани учун миннатдорлик билдириб, халқ вакили деган юксак мақомга эга бўлган барчани табриклади.
Сайлов натижасида юртимизда ҳуқуқ ва ваколатлари сезиларли даражада кучайган янги вакиллик органлари тизими ҳам шакллангани таъкидланди, деди Шавкат Мирзиёев.
«Шу тариқа мамлакатимиз демократик тараққиётнинг янги даврига, сифат жиҳатидан янги босқичига қадам қўймоқда», — деди у.
«Биз барча бўғиндаги депутатларимиз тимсолида зиммасидаги масъулиятни чуқур англайдиган, Янги Ўзбекистонни барпо этиш, халқимизнинг эркин ва фаровон ҳаётини таъминлаш йўлида ўзини аямасдан тинимсиз ҳаракат қиладиган, бор билим ва тажрибасини Ватан равнақи учун сафарбар этадиган фидойи инсонларни тасаввур қиламиз, — деди давлат раҳбари.
Шунингдек, у партиялар ва депутатликка номзодларнинг сайловолди дастурларида фуқароларнинг орзу-интилишлари, дарду ташвишлари, мавжуд муаммоларни ҳал этиш йўллари ўз ифодасини топганини таъкидлади.
«Халқимиз сизларнинг янги ғоя ва ташаббусингизга катта умид ва ишонч билан қарамоқда. Эл-юртимиз янги парламент ва маҳаллий кенгашлар аъзоларидан кўп нарсани кутмоқда», — деди президент.
Шавкат Мирзиёев депутатлар олдида турган муҳим вазифаларни бажаришда куч-қувват, муваффақият ва омад тилади.
