Эрон пойтахти Теҳронда университет ҳовлисига ички кийимда чиққан талаба қўлга олинди, деб хабар бермоқда Iran International. Исми ошкор қилинмаган қизнинг ҳибсга олингани таълим муассасаси маъмурияти томонидан тасдиқланди.
Тармоқларда университет ҳудудида ички кийимда юрган талаба қиз тасвирланган видео тарқалди. Таъкидланишича, қиз 2 ноябрь куни қўлга олинган. Қизнинг бу иши норозилик акцияси бўлган. Аввалроқ у, бир версияга кўра, ҳижобни нотўғри ўрагани учун, бошқа версияга кўра, уни киймагани учун ҳужумга учраган. Талаба қизга университет хавфсизлик кучлари ходимлари ва «Басиж» ёшлар ташкилоти вакиллари томонидан ҳужум қилиниб, кийимлари йиртилгани айтилмоқда.
Қўлга олиш пайтида қиз яна зўравонликка учради, деб ёзади Iran International гувоҳларга таяниб. Шу билан бирга, унинг боши машина эшигига урилгани, бу эса кучли қон кетишига олиб келгани таъкидланмоқда.
Reuters`нинг университет расмийларига таяниб таъкидлашича, ҳибсга олинган қиз «кучли руҳий босим остида» ва «руҳий ҳолати бузилган». Маҳаллий ОАВ қиз руҳий касалликлар шифохонасига ётқизилиши мумкинлигини ҳам билдирган.
Эрондаги Amnesty International ҳуқуқ ҳимоячилари ҳибсга олинган қизни зудлик билан озод этишни талаб қилмоқда.
Эрондаги 2022 йилги норозилик намойишлари
2022 йил сентябрь ойида Теҳронда «ахлоқ полицияси» томонидан ҳибсга олинган Маҳса Aминий полиция ҳибсхонасида вафот этгани тўғрисидаги хабар ортидан Саққез шаҳрида бошланган норозилик намойишлари тўлқини бутун мамлакат бўйлаб ёйилган ва намойишни куч билан бостириш вақтидаги оммавий қирғинларга сабаб бўлган. 22 ёшли талаба қиз ҳижобни тўғри ўрамагани учун «ахлоқ полицияси» томонидан ҳибсга олинган.
Маълумотларга кўра, мамлакат расмийлари AҚШ ва Исроилни норозилик намойишларини ташкил қилишда айблаган, бироқ норозиликларнинг ҳукуматнинг сиёсий қатағонлари, коррупция ҳамда иқтисодиётдаги нотўғри бошқарув сабаб оммавий тус олган.
Ҳукумат намойишларни куч билан бостиришга ҳаракат қилган. Инсон ҳуқуқлари гуруҳларига кўра, мамлакат хавфсизлик кучлари сув пуркагичлардан фойдаланган, шунингдек, ўқ узган, намойишчилар эса тош отган, полиция машиналарига ва жамоат биноларига ўт қўйган. Шунингдек, инсон ҳуқуқлари гуруҳлари намойишлар вақтида камида 450 киши ўлдирилганини маълум қилган. The New York Times Эрон расмийлари намойишчиларни омма олдида қатл қила бошлагани тўғрисида хабар қилган.
2023 йилда Эрон ҳукумати ҳижоб киймайдиган аёлларни таъқиб қилиш учун янги воситалар, жумладан, «ақлли камералар»ни жорий қилган.
