Япония Либерал-демократик партияси (ЛДП) раҳбари Шигэру Ишиба Вакиллар палатасида (парламентнинг қуйи палатаси) иккинчи босқичда овоз бериш натижаларига кўра мамлакат бош вазири этиб сайланди. Бу ҳақда 11 ноябрь куни Япониянинг 47 News портали хабар берди.
Ишиба 221 овоз, унинг рақиби, мухолифатдаги Конституциявий-демократик партия (КДП) раҳбари Ёшиҳико Нода эса 160 та овоз олди. Ишиба кўпинча бир партиялилар учун баҳсли бўлган либерал қарашлари билан танилган ва жамоатчилик орасида машҳур.
Аниқлаштирилишича, Ишиба ҳукумати озчилик ҳукуматига айланади. Япония парламентидаги ЛДП «Комэйто» партияси билан коалицияда иш олиб бормоқда ва 27 октябрь куни бўлиб ўтган парламент сайловлари натижаларига кўра, бирлашма кўпчилик ўринларни йўқотган. Шундай қилиб, 1994 йилдан бери 30 йил ичида биринчи марта ва тарихда тўртинчи марта бош вазир сайловларнинг биринчи босқичида сайланмади.
Бош вазир, 67 ёшли сиёсатчи Ишиба сентябрь ойи охирида бўлиб ўтган ЛДП раҳбари сайловида ғалаба қозонган, натижада у 1 октябрда биринчи сайловда бош вазир этиб сайланган, чунки ўшанда ЛДП қуйи палатадаги ўринларнинг ярмидан кўпига эга эди. Шундан сўнг у «халқ иродасини билиш» учун парламентни тарқатиб юбориш ва сайловлар ўтказиш ниятини эълон қилган.
Аслида эса сайловлар ҳукуматнинг тез пасайиб бораётган рейтингини тўғрилаш учун зарур эди. Ишибадан олдинги бош вазир Фумио Кишида даврида Вазирлар Маҳкамасининг рейтинги 20% га тушганди.
Кишида сентябрь ойидаги ҳукмрон партия раиси сайловларида иккинчи муддатга номзодини кўрсатмаслигини билдирганди ва шу тариқа ҳукумат раҳбари лавозимини тарк этган. Бундай қарорни у қатор сиёсий можаролар фонида қабул қилган.
