Сирдарё вилоятида пора олганликда гумонланган ЙҲХБ катта инспектори суд қилинди. Бу ҳақда «Бу кун» дастури хабар қилди.
Қайд этилишича, катта инспектор йўл-транспорт ҳодисаларидан бирини расмийлаштириб, йўловчилардан бирининг тан жароҳати оғирлигини аниқлаш учун суд-тиббий экспертиза тайинлаган. Ҳайдовчининг автомобили ўша куниёқ жарима майдончасига жойлаштирилган.
Бир неча кундан сўнг инспектор ҳайдовчини ўз хизмат хонасига чақирган. У 400 доллар эвазига ҳайдовчига дастлабки текширув материалларини унинг фойдасига ҳал қилишни, суд-тиббий экспертиза натижаларини енгиллаштириш ва автомобилни жарима майдончадан қайтариб олишга кўмаклашишни ваъда қилган.
Бироқ ҳайдовчи инспекторнинг таклифини рад этиб, ҳуқуқни муҳофаза қилиш органларига мурожаат қилган. Унинг аризасига асосан ўтказилган тезкор тадбир давомида катта инспектор ўз хизмат хонасида 200 АҚШ доллари олаётган пайтда қўлга олинган.
Суд катта инспекторни Жиноят кодексининг 210-моддаси 1-қисмида (Пора олиш) назарда тутилган жиноятни содир этганликда айбдор деб топиб, 3 йил муддатга ички ишлар органларида ҳар қандай лавозимни эгаллаш ҳуқуқидан маҳрум қилган ҳолда, 4 йил муддатга озодликдан маҳрум қилиш жазосини тайинлади.
