Россия президенти Владимир Путин ва Германия канцлери Олаф Шольц 2022 йил декабрь ойидан буён илк бор телефон орқали мулоқот қилди. Кремлнинг билдиришича, диалог Германия томони ташаббуси билан ташкил этилди.
«Украинадаги вазият юзасидан батафсил ва очиқ фикр алмашилди. Владимир Путин ҳозирги инқироз НАТОнинг Украина ҳудудида Россияга қарши плацдарм (бирор давлатнинг бошқа бир давлатга ҳужум қилишида ҳарбий ҳаракатларни кенгайтириш учун база сифатида фойдаланиладиган ҳудуд — таҳр.) яратишга қаратилган кўп йиллик тажовузкор сиёсатининг тўғридан-тўғри натижаси эканини эслатиб ўтди, бунда мамлакатимизнинг хавфсизлик соҳасидаги манфаатлари эътиборга олинмайди ва русийзабон аҳоли ҳуқуқлари поймол қилинади», — дейилади баёнотда.
Суҳбатда Россия-Германия муносабатларидаги аҳволга ҳам тўхталиб ўтилди. Қайд этилишича, Путин ГФР ҳукуматининг дўстона бўлмаган сиёсати оқибатида уларнинг барча йўналишларда мисли кўрилмаган таназзулга учраганини таъкидлади. Россия энергетика соҳасидаги шартномавий мажбуриятларини доимо аниқ бажаргани, агар Германия манфаатдор бўлса, ўзаро манфаатли ҳамкорликка тайёр экани айтиб ўтилди. Шунингдек, Яқин Шарқда кескинлашиб бораётган вазият муҳокама қилинди.
Песков Путиннинг Шольц билан суҳбати ҳақида: «Фикрларнинг қандайдир мос келиши ҳақида гап бўлиши мумкин эмас, аммо мулоқот фактининг ўзи жуда ижобий».
Германия канцлери матбуот хизмати:
«Олаф Шольц Россиянинг Украинага қарши тажовузкор урушини қоралади. Владимир Путинни урушни тўхтатишга ва қўшинларни олиб чиқишга чақирди. У Москва Украина билан адолатли ва мустаҳкам тинчликка эришишни назарда тутувчи музокараларга тайёр бўлиши кераклигини таъкидлади. Германия Украинани Россия тажовузига қарши курашда қанча керак бўлса, шунча қўллаб-қувватлашга қатъий қарор қилганини таъкидлади. Путин билан қўнғироқ қилишдан олдин у Владимир Зеленский билан гаплашди».
Киевдаги манбанинг Reuters агентлигига маълум қилишича, Россия билан уруш пайтида Украинанинг яқин иттифоқчиси бўлган Шольц Зеленскийга Россия раҳбари билан учрашиш режалари ҳақида олдиндан хабар берган. Зеленский эса Шольцни Путин билан мулоқотдан қайтарган.
«Канцлер президентимизга Путин билан гаплашмоқчи эканини айтганди. Президент бу Путинга фақат унинг изоляциясини камайтириш орқали ёрдам беришини айтди. Путин ҳақиқий тинчликни истамайди, танаффусни хоҳлайди», — дейди манба.
«У билан гаплашиш Путинга вазиятни ўзгартиришга ва урушни давом эттиришга имкон беради. Бу тинчлик келтирмайди, чунки Путин йиллар давомида айтган ёлғонларини такрорлайди ва ўзини энди ёлғиз эмасдек кўрсатади», — деб қўшимча қилинади хабарда. Reuters мулоқот бир соат давом этганини таъкидлади.
- Берлин Украинанинг йирик молиявий қўллаб-қувватловчиси ва Қўшма Штатлардан кейин унинг энг йирик қурол етказиб берувчисидир. Унинг Киевга келгусидаги ёрдами Дональд Трампнинг шу ой АҚШ президентлик сайловларида ғалаба қозонганидан кейин ноаниқ кўриниш олди.
