Конституциясининг 33 йиллиги муносабати билан Тошкент — Бухоро — Тошкент йўналишида янги поезд қатнови йўлга қўйилади, дея хабар бермоқда «Ўзтемирйўлйўловчи» компанияси матбуот хизмати.
Қайд этилишича, мазкур дизель поезди «Тошкент йўловчи вагонларини қуриш ва таъмирлаш заводи»да шартнома асосида қурилган бўлиб, таркиби 12 та: 2 та VIP, 4 та бизнес (ўриндиқлари йўналиш бўйича ўзгаради), 4 та эконом, 1 та ресторан ва 1 та дизель вагонларидан иборат.
«Ўзтемирйўлйўловчи» компанияси бош муҳандиси Фозил Шариповнинг «Газета.uz»га аниқлик киритишича, ҳозирда у мазкур йўналишда синовдан ўтказилмоқда. Хусусан, яқинда таркиб биринчи марта Самарқандга бориб келган.
«Шу пайтгача бу йўналишда электрлаштирилган поездлар қатнаб келган. Совитиш тизими ва чироқлар поезд 40 км тезликда ҳаракатлана бошлаганидан сўнг ёқиларди. Янги вагонларда эса улар дизель эвазига поезд бекатларда тўхтаб турганида ҳам ишлашда давом этади, худди „Афросиёб“ поездлари каби», — деди Фозил Шарипов.
Унинг сўзларига кўра, чипта нархлари «Шарқ» поездларидаги каби бўлади. Лекин бизнес ва VIP тарифларга айри қулайликлар қўшилгани учун ўзгариши мумкин.
«Тахминан 6−7 декабрларда йўловчиларга фойдаланишга топширилиши режалаштирилмоқда. Чипталар поезд ҳаракати куни аниқ бўлганида савдога чиқарилади. Ҳозир мутахассислар ишламоқда», — деди компания вакили.
«Йўловчиларимиз вагонлар эскирган, кўпи 80-йилларда ишлаб чиқарилган, бизга тўғри келмаяпти, деб арз қилишаётганди. Шунинг учун, босқичма-босқич ҳамма вагонларни янгисига алмаштиришни бошлаймиз. Президентимиз яқинда 70 та вагон учун пул ажратиб берган. Уларни ҳам 2025−2026 йилларда „Тошкент йўловчи вагонларини қуриш ва таъмирлаш заводи“ қуриб беради», — дея қўшимча қилди «Ўзтемирйўлйўловчи» компанияси бош муҳандиси.
Поезд ҳаракат вақти 6 соатдан иборат бўлиб, 592 км масофани босиб ўтади.
