Бугун футбол бўйича Ўзбекистон миллий терма жамоаси ЖЧ-2026 саралашининг учинчи босқичи доирасида КХДРга қарши майдонга тушади. Учрашув Лаосдаги нейтрал майдонда, соат 17:00 дан бошлаб бўлиб ўтиши белгиланган.
Статистика
Ўзбекистон жаҳон чемпионатларининг финал босқичида ҳеч қачон иштирок этмаган, аммо ҳозир терма жамоа мундиалга йўлланма олишга яқин турибди. Материал эълон қилинаётган вақтда у «А» гуруҳида 10 очко билан иккинчи ўринда, БАА ва Қатардан уч очко олдинда бўлиб турибди. Сўнгги турда айнан қатарликлар билан ўйнаган ўзбекистонликлар 2:3 ҳисобида аламли мағлубиятга учради. Ҳал қилувчи гўл қўшиб берилган дақиқаларнинг ўн иккинчисида киритилди.
Саралаш босқичининг дастлабки тўрт турида Сречко Катанец шогирдлари КХДР (1:0), Қирғизистон (3:2) ва БАА (1:0) термаларини мағлуб этган, шунингдек, Эрон билан дуранг ўйнаганди (0:0).
КХДР жаҳон чемпионати саралашининг иккинчи босқичидаёқ муаммоларга дуч келди, аммо якунда ўз квартетида Сурия ва Мянмани ортда қолдирди. Гуруҳда биринчи ўринни Япония, иккинчи ўринни эса КХДР эгаллади.
Ҳозирда шимолий кореяликлар гуруҳда охирги ўринда бўлиб турибди. Тўртта ўйинда КХДР фақат Қатар (2:2) ва БАА (1:1) билан дуранг ўйнаб жами 2 очко олди. Бошқа учрашувларда Син Ён-Нам шогирдлари Ўзбекистон (0:1), Қирғизистон (0:1), бир неча кун аввал эса иккинчи бўлимни озчилик бўлиб ўтказган Эронга (2:3) имкониятни бой берди.
Ўзбекистон Қатарга мағлуб бўлгач, Сречко Катанец бошчилигида 17 ўйиндан иборат асосий вақтдаги мағлубиятсиз серияга якун ясалди. Шимолий Корея терма жамоаси эса кетма-кет етти учрашувдан бери ғалаба қозона олмаяпти ва бу туфайли гуруҳда қийин аҳволга тушиб қолди.
Миллий терма жамоа 2015 йилдан буён ўтказилган сўнгги бешта ўйинда КХДР термасига мағлуб бўлмаган.
Умуман олганда, рақиблар ўзаро 11 марта тўқнаш келган, Ўзбекистонда 8 ғалаба, 2 дуранг ва 1 мағлубият. 7 та гол ўтказиб юборилган бўлса, 21 та гол урилган.
Учрашув олдидан матбуот анжуманидаги гаплар
Ўзбекистон миллий терма жамоаси бош мураббийи Сречко Катанец Қатар билан ўйиндан сўнг футболчиларда тайёргарлик учун етарлича вақт бўлганини, лекин улар машғулот ўтказган майдон сифати яхши эмаслигини қайд этиб ўтди.
«Биринчи учрашувдан сўнг тайёргарлик учун етарлича вақт бўлди. Футболчиларнинг барчаси тайёргарликни давом эттиришди. Фақатгина майдон масаласида сал муаммолар бўлди. Тайёргарлик учун ишлатилган майдон яхши эмасди. Шунга қарамасдан бизни эртага муҳим учрашув кутиб турганини яхши биламиз. Ижобий натижа қайд этиш учун барча ишни қиламиз», — деди у.
Жалолиддин Машарипов ҳам майдон ҳолати билан боғлиқ муаммолар бўлганини таъкидлади. Шунга қарамай, футболчи ҳозир бунга эътибор қаратиш вақти эмаслигини қўшимча қилди.
«Кейинги ўйинга тайёрмиз. Айтиб ўтилганидек, машғулотлар вақтида майдонда кичик муаммолар бўлди. Лекин ҳозир бу нарсага қарайдиган пайт деб ўйламаймиз. Қўлимиздан келганча энг яхши ўйинимизни кўрсатиб, 3 очкони қўлга киритиш учун келдик. Олдимиздаги вазифа фақат шу», — деди Машарипов.
Катанец матбуот анжумани давомида Қатардан учралган мағлубиятни ҳам эслаб ўтди.
«Саралашдаги барча учрашувларни умуман йўқотишларсиз ўтказишнинг иложи йўқ. Шу сабабли, эртага майдонга тушадиган футболчилар ўзини кўрсатадиган вақт келди деб ўйлайман. Улар бу имкониятдан яхши фойдаланишлари талаб этилади», — деди у.
Жалолиддин Машарипов эса футболчилар билан биринчи ўйинни тезроқ эсдан чиқарган ҳолда бу ўйинга диққатни қаратиш кераклиги ҳақида гаплашилганини айтди.
«Мен тайёрмиз деб ўйлайман. Чунки биз кучли терма жамоамиз. Кучли жамоалар футболда доим бундай даврларни бошидан ўтказиб туради. Биз кучли жамоа эканимизни биламиз. Футболчилар билан биринчи ўйинни тезроқ эсдан чиқарган ҳолатда бу ўйинга диққатни қаратишимиз кераклиги ҳақида гаплашдик. Чунки иккинчи ўйин ҳам ўшани ўйлаган ҳолатда ўтиб кетишини истамаймиз. Кучли терма жамоа ҳеч қачон иккита ўйинда кетма-кет ютқазмайди. Худо хоҳласа, биз кучли терма жамоамиз ва буни эртанги ўйинда кўрсатиб, мухлисларимизни 3 очко билан хурсанд қилишга ҳаракат қиламиз», — Жалолиддин Машарипов.
Шимолий Корея терма жамоаси бош мураббийи Син Ён-Нам учрашувда муваффақият қозониш учун жамоа қўлидан келган барча имкониятни ишга солишини таъкидлади ва бунинг учун етарлича тайёргарлик кўрилганини қайд этди. Унинг айтишича, Шимолий Корея терма жамосида Ўзбекистонга қарши ўйин учун алоҳида стратегия мавжуд.
«Ўйин билан боғлиқ барча тайёргарликларни пухта бажардик. Учрашув давомида юзага келиши мумкин бўлган ўзгаришларга мослашиш жуда муҳим. Футболчиларимиз ўйинга тўлиқ тайёр ва яхши натижага эришиш учун барча имкониятларимизни ишга соламиз», — деди у.
Матбуот анжуманида қатнашган Шимолий Корея терма жамоаси ҳужумчиси Хан Кван Сон ҳам Ўзбекистон терма жамоаси чуқур ўрганилгани ва уларга қарши қандай ўйнаш кераклиги аниқлаб олинганини таъкидлади.
«Шу сабабли эртанги баҳсда яхши натижаларга эришамиз, деб ўйлайман. Биз Ўзбекистонга қарши дастлабки учрашувда кутилган натижага эришолмадик. Бу муваффақиятсизлик сабабларини таҳлил қилиб, навбатдаги ўйин учун чуқур тайёргарлик кўрдик. Эрон жамоасига қарши баҳсда йўл қўйган камчиликларимизни Ўзбекистон жамоасига қарши баҳсда такрорламаслик учун бор маҳоратимизни ишга соламиз», — деди у.
Эслатиб ўтамиз, Қатар билан бўлган учрашувида Ўзбекистон терма жамоаси футболчилари Элдор Шомуродов ва Отабек Шукуров жароҳат олганди. Маълум бўлишича, шифокорлар хулосасига кўра, улар Шимолий Корея терма жамоасига қарши ўйинда майдонга туша олмайди.
