Ўзбекистон президенти Шавкат Мирзиёев 18 ноябрь куни Олий Мажлис Қонунчилик палатасининг сайловдан кейинги биринчи мажлисида иштирок этди.
«Биз ягона кучмиз, ягона миллатмиз. Мана шу миллатимизнинг, жонажон ватанимизнинг эртанги кунига бефарқ бўлмасдан ҳаракат қилишимиз керак. Ҳаммангиз ватанпарварсизлар, ҳар бирингизнинг [парламентда] ўрнингиз алоҳида. Халқ ноиби бўлиш ҳаммага ҳам насиб қилмаган. Бу ерда ўтирган халқ ноиби юрагидан хизмат қилишга тайёр бўлиши керак», деди у йиғилиш якунида («Ўзбекистон 24» телеканали сюжети асосидаги нутқ).
«Биз жуда катта ислоҳотларни бошладик. Халқимиз мана шу ислоҳотларга ишоняпти. Унинг бардавомлиги сиз билан бизга боғлиқ. Янги Ўзбекистоннинг янги парламенти — Қонунчилик палатаси шуни назорат қиладиган тизимни яратиб, амалга оширса, мен сизлардан миннатдор бўламан, — деди давлат раҳбари.
Шавкат Мирзиёев яна бир бор парламентда «албатта, муҳокама ва муҳолифат бўлиши керак», дея таъкидлади.
«Ушбу рақобатда халқчил қонунлар пайдо бўлади. Рақобатда одамларнинг дарду ташвишлари қоғозда ўз аксини топади ва амалда ошади… Бугун тарихий кун. Бугун сўзга чиққанлар бу бошқа Ўзбекистон, бошқа халқ эканини таъкидладилар. Буни чуқур тушунишингизни илтимос қиламан. Халқимиз сизни умид билан сайлади. Халқимиз овозига муносиб бўлайлик, халқимизни қадрига етайлик. Бу буюк халқ бизга ишондими, мана шу ишончни оқлайлик», деди президент.
Аввалроқ давлат раҳбари янги даврда Ўзбекистон парламенти ҳақиқий халқ уйига, унинг қуйи палатаси эса ғоялар генераторига, соғлом рақобат ва баҳс-мунозаралар майдонига айланиши кераклигини таъкидлаганди. У парламентдаги мухолифатни фаоллаштириш зарурлигини қайд этиб, унинг ҳуқуқларини кенгайтиришни таклиф қилди.
