Футбол бўйича Ўзбекистон терма жамоаси бош мураббийи Сречко Катанец ва дарвозабон Ўткир Юсупов 19 ноябрь куни бўлиб ўтган КХДР қарши ўйиндан кейинги матбуот анжуманида қатнашди. Жамоа Лаосда бўлиб ўтган учрашувда 1:0 ҳисобида ғалаба қозонди.
Учрашувнинг ягона голига Аббосбек Файзуллаев муаллифлик қилди. Иккинчи таймда Ўзбекистон дарвозаси томон белгиланган пенальтини Ўткир Юсупов қайтарди. Ўйиннинг биринчи тайми Ўзбекистоннинг устунлигида ўтган бўлса, иккинчи таймда КХДР ташаббусни тўлиқ қўлга олди.
«Биринчи бўлимни яхши ўтказдик, рақибда имконият бўлмади. Иккинчи бўлимда Бобир Абдихолиқов вазиятдан фойдаланганида ўйин енгил кечиши мумкин эди. Ҳимояланаётган вақтда жарима майдончаси ичида тўп қўлга тегиши бўлиб туради. Бахтимизга Ўткир Юсупов пенальтини қайтарди ва биз ўзимизга керакли натижани қайд эта олдик», — деди Катанец матбуот анжумани бошида.
Фото: Chempionat.asia
Ўткир Юсупов ўйиндан қониқиш ҳосил қилганини таъкидлади.
«3 очко қўлга киритганимиздан хурсандман. Бир кун олдин йигитлар билан гаплашган эдик. Тактикани йиғиштириб, ҳамма юракдан ўйнаса ютишимизни айтгандик», — деди дарвозабон.
Катанец терма жамоа ҳар бир ўйинда фақатгина бир тайм яхши ўйнаётгани, фақатгина бир тайм футбол ўйнайдиган жамоа бўлиб қолаётгани ҳақидаги саволга жавоб берди.
«Менимча, 90 дақиқа бир хил ўйнайдиган жамоаларни топиш қийин бўлса керак, балки 1−2 та топ жамоаларни инобатга олмаса. Бугун, яна шуни инобатга олиш керакки, жуда ҳам қийин шароитда ўйнадик. Юқори намлик, вақтдаги фарқлар. Қатарга қарши ўйинда охирги сонияларда ўтказиб юборилган гол жамоанинг руҳиятига таъсир қилмасдан қолмасди. Шунга қарамай, футболчилар ўзига келишига муваффақ бўлди. Тан олиш керак, бугун айрим етакчи футболчиларсиз келдик. Уларнинг ўрнига тушганлар жуда яхши ўйин кўрсата олишди», — деди мураббий.
«ОФКга мурожаат қилмоқчи эдим. Биз, биринчи навбатда, футболчиларимиз соғлиғини ўйлашимиз керак. Бундай майдонда тўп суриш футболчиларнинг соғлиғи учун хавфли. Машғулот майдонимиз бундан ҳам ёмон ҳолатда эди. Бу ердаги ташкилий қўмитага эътирозим йўқ, фақат майдонни гапирдим», — дея қўшимча қилди Катанец.
Юсупов эса у КХДР футболчиларининг пенальти тепишини ўрганиб чиққани ҳақидаги саволга қуйидагича жавоб берди.
«КХДР футболчиларини қаердан ўрганасиз? Уларнинг чемпионатини кўра олмайсиз. Пенальтига келсак, дарвозабонларда ички ҳиссиёт бўлади, қаерга тепишини сезиб туради. Ўнг тарафга тепишини ҳис қилдим. Аллоҳ [мени] омадли қилиб қайтардим. Муҳими 3 очко қўлга киритдик. Халқимиз хурсанд бўлса бўлди. Биз шунинг учун ўйнаяпмиз», — деди жамоа дарвозабони.
Катанец журналистнинг бу сафарги саралашда футболчилар ва ассоциация мураббийга ишонч билдираятгани, агар аввалги саралашларда бундай ҳолат бўлганида бош мураббий истеъфога чиқарилган бўлиши ҳақидаги фикрларига қуйидаги жавобни берди.
«Мен ўз ишимни қиляпман. Футболчиларга қўллаб-қувватлаш учун раҳмат айтаман. Қатар билан ўйиндан сўнг яхши вазиятда эмасдик. Олдинги мураббий алмашинувларига келсак, тўғриси билмайман. Бу раҳбариятнинг қарори. Ҳозирги ҳолатимиз анча яхши, мавжуд 6 та ўйин ичидан 18 очконинг 13 тасини тўплашга муваффақ бўлдик. Бизни яна 4 та ўйин кутмоқда. Биз кейинги 12 очко учун ҳаракат қилишимиз керак. Футболчиларга доим кураш охиригача бўлишини айтаман. Эртароқ ҳал қиламиз деган руҳият бўлмаслиги керак. Албатта, ЖЧ йўлланмасини эрта қўлга киритсак яхши бўларди. Аммо биз охиригача курашишга тайёрмиз. 10 та ўйинни ютиш осон эмас, айниқса муҳим футболчилар иштирок эта олмаса», — деди бош мураббий.
Маълумот учун, «А» гуруҳида беш турдан сўнг Эрон 16 очко билан етакчилик қилмоқда, Ўзбекистон эса 13 очко билан иккинчи ўринда бормоқда. БАА учинчи ўринни эгаллаб турибди — 10 очко, кейинги ўринларда Қатар (7), Қирғизистон (3) ва КХДР (2) жойлашган.
Олдинда яна тўрт тур бор. Кейинги ўйинни Ўзбекистон 2025 йил 20 март куни Тошкентда Қирғизистонга қарши ўтказади.
