Давлат активларини бошқариш агентлиги Тошкент шаҳрининг Юнусобод туманидаги International (Inter Hotel) меҳмонхонаси хусусийлаштирилгани ҳақида хабар берди.
Хусусийлаштириш жараёнида Deloitte халқаро консалтинг компанияси маслаҳатчи сифатида, Ernst & Young эса мустақил баҳолаш ишларини амалга ошириш учун жалб этилди.
Давактив маълумотларига кўра, объектга олтита компания қизиқиш билдирган, аммо уларнинг фақат учтаси мажбурий таклифларни тақдим этган.
Савдолар ғолиби 26 миллион доллар таклиф қилган Smart Fast Stroy компанияси бўлди. Хабарга кўра, инвестор меҳмонхонанинг тегишли банк олдидаги 14,7 миллион евро миқдоридаги кредит қарздорлигини ҳам ўз зиммасига олади, шунингдек, 41 миллион доллардан ортиқ маблағ йўналтириш мажбуриятини олмоқда.
Давлат активларини бошқариш агентлигининг тасдиқлашича, нарх баҳоланган қийматдан анча юқори бўлган.
Меҳмонхонани хусусийлаштириш жараёни жорий йилнинг май ойида бошланганди.
Меҳмонхона ҳақида
Меҳмонхона 1997 йилда Тошкент шаҳрининг Юнусобод туманида қурилиб, дастлаб InterContinental томонидан бошқарилган. У Ўзбекистондаги биринчи беш юлдузли меҳмонхона бўлган.
2012 йил май ойида, 15 йиллик фаолиятдан сўнг, меҳмонхона бренди Ўзбекистонни тарк этди ва меҳмонхона International номини олиб, давлат тасарруфига ўтди (2022 йилда InterContinental Ўзбекистонга қайтиб, шаҳар марказидаги янги меҳмонхонани бошқаришни бошлади).
Бинода 232 та хона, 7 та конференц-зал, 2 та ресторан, барлар ва очиқ айвон, шунингдек, бассейнли фитнес-клуб мавжуд. Бино ва иншоотларнинг умумий майдони 45 минг квадрат метрни, ер майдони эса 3 гектарни ташкил этади.
Меҳмонхона Accor гуруҳи билан сублицензия шартномасини имзолаган бўлиб, у Швейцариянинг Mövenpick брендидан, шунингдек, бронь қилиш тизимлари ва TARS Accor Hotels тармоғининг бошқа IT-тизимларидан фойдаланиш имкониятини беради.
Харидор ҳақида
КТЯДР маълумотларига кўра, Smart Fast Stroy 2023 йил август ойида рўйхатдан ўтган ва нотурар жой бинолари қурилиши билан шуғулланади. Илгари компаниянинг таъсисчиси Муҳиддин Усмон ўғли Муҳиддинов бўлган, ҳозирда эса Александр Валерьевич Захарян, раҳбар — Тимур Зокиров.
Захарян, шунингдек, Octo (IT-компания), Octopay (тўлов хизмати), Finance Invest Brok брокерлик компанияси, Octotelecom (банклар, дўконлар, тўлов тизимлари ва давлат ташкилотлари учун SMS-хабарномалар), компьютер ўйинлари ишлаб чиқарувчи Octo Games, Octo Smp, Octo Integro компанияларида ҳам улушларга эга.
2023 йил сентябрь ойида, ташкил этилганидан бир ҳафта ўтиб, компания Тошкент шаҳрининг Мирзо Улуғбек туманида, Мудофаа вазирлиги Марказий ҳарбий госпиталидан унча узоқ бўлмаган ҳудудда 1 гектар ер майдонини 48 миллиард сўмга сотиб олган. Аукцион 6 сентябрь куни бўлиб ўтди ва 10 дақиқадан сал кўпроқ давом этган.
