Шавкат Мирзиёев 21 ноябрь куни амалий ташриф билан Ўзбекистонда бўлиб турган Россия Федерацияси бош прокурори Игорь Красновни қабул қилди. Бу ҳақда президент матбуот хизмати хабар берди.
Томонлар икки томонлама кенг қамровли стратегик шериклик муносабатларини олий даражада эришилган келишувларга мувофиқ ривожлантириш масалаларини кўриб чиқди.
Бундан ташқари, терроризм, экстремизм, кибержиноятлар, коррупция ва ноқонуний миграцияга қарши курашиш соҳаларида, жиноий активларни қайтариш, сунъий интеллектни жорий этиш ва рақамлаштириш борасида бош прокуратуралар ўртасидаги ҳамкорликнинг амалий жиҳатлари муҳокама қилинди.
Президент мамлакатлар прокуратура идоралари ўртасида яқин мулоқотни йўлга қўйиш, ўзаро алоқа ва алмашинувларни кенгайтириш, қўшма тадбирлар ўтказиш зарурлигини таъкидлади.
