Шавкат Мирзиёев 22 ноябрь куни маданият ва санъат соҳасини ривожлантириш, хусусан, театрларнинг жамият маданий ҳаётидаги аҳамиятини ошириш ва улар фаолиятини қўллаб-қувватлашга оид таклифлар тақдимоти билан танишди, деб хабар бермоқда президент матбуот хизмати.
Чора-тадбирлар режасига кўра, 2025−2030 йилларда театрларда «Миллий қаҳрамон» ва «Инсон қадри учун» мавзуларида 32 та туркум спектакллар яратиш таклиф этилмоқда.
Саҳна асарларини яратишда ижодий ҳамкорликни қўллаб-қувватлаш, драматургия ва режиссёрликни ривожлантириш бўйича таклифлар билдирилди. Хусусан, театр драматурглари учун Маҳмудхўжа Беҳбудий, ёш режиссёрлар учун Баҳодир Йўлдошев номидаги мукофотларни таъсис этиш, «Нигоҳ» ижодий лойиҳасини йўлга қўйиш, миллий академик мусиқа санъати бўйича композиторлар танловини ўтказиш таклиф этилди.
Тақдимотда маданият ва санъатнинг таълим билан узвий ҳамкорлигини мустаҳкамлаш, талабаларнинг театрларда амалий машғулотларини кенгайтириш, театр соҳасига оид илмий-тадқиқот ишига буюртмалар бериш масалаларига алоҳида тўхталиб ўтилди.
Театр актёр ва режиссёрлари, театршунос ва санъатшуносларнинг маҳорат мактабларини ташкил этиш режалаштирилмоқда. Театр танқидчилари ва драматурглар клуби ташкил этилиб, уларнинг фаолияти қўллаб-қувватланади. Ҳар йили нодавлат театрларга ҳам давлат буюртмаси берилади.
Умумий ва олий таълим муассасаларида ҳаваскор театр жамоалари тузилиб, улар ўртасида танловлар ўтказилади. Ёшларни театрларга доимий ташрифларини назарда тутувчи «Театр — ибратхонадир» дастури амалга оширилади.
Келгуси йилдан Ўзбекистон театр жамоаларининг миллий рейтинги тузилади. Ҳудудлардаги театр бинолари мукаммал таъмирланиб, замонавий технологиялар асосида модернизация қилинади. Муқимий номидаги Ўзбекистон давлат мусиқали театрига «академик» мақоми берилади.
Бундан ташқари, тақдимотда соҳа вакилларини рағбатлантириш масалаларига ҳам алоҳида эътибор қаратилди. 2025 йилдан бошлаб маданият ва санъат, ахборот-кутубхона ва музейлар соҳасида фаолият олиб бораётган ходимлар иш ҳақи миқдорлари оширилиши белгиланди.
Маданият вазири Озодбек Назарбеков ва Президенти администрациясининг Ижтимоий ривожланиш департаменти раҳбари Одил Абдураҳмонов.
Моддий манфаатдорлик ходимнинг иш самарадорлиги (KPI) кўрсаткичларига боғланади. Унда аҳолига маданий хизмат кўрсатиш, айниқса, олис ҳудудларга гастроллар уюштириш, янги асарлар яратиш, иқтидорли ёш ижодкорларни излаб топиш каби мезонлар инобатга олинади.
Шунингдек, 2025 йилдан бошлаб Миллий симфоник оркестр ходимларининг иш ҳақлари оширилиб, муносиб моддий рағбатлантирилади. Оркестр жамоаси томонидан давлат буюртмаси асосида ҳар йили янги мусиқий асарлар яратилади, маҳоратли дирижёр, оркестр ижрочиларининг маҳорат мактаблари фаолияти йўлга қўйилади. Оркестр жамоасининг ҳудудлар ва хорижий гастроль сафарлари ташкил этилади, йирик корхона ва ташкилотлар ходимлари учун концерт намойишлари ташкил этилади.
Шу билан бир қаторда, давлат раҳбари томонидан маданият ва санъат таълимини янги босқичга кўтариш масалалари бўйича ҳам алоҳида топшириқлар берилди. Хусусан, иқтидорли ёшларни барвақт аниқлаш, саралаш ва ўқитиш бўйича яхлит тизим яратиш, шунингдек, умумий ўрта, мактабдан ташқари, касбий, олий таълим ташкилотлари ҳамда маданият ва санъат тизимидаги таълим муассасаларида ўқув режалари ва дастурларининг ўзаро мувофиқлигини таъминлаш вазифаси қўйилди.
Президент 2023 йил декабрь ойида давлат идоралари ходимлари ва раҳбарлар театрларга ташриф буюриши учун ҳар ойнинг бир кунини «Театр куни» деб эълон қилишни таклиф этганди. Музейлар фаолиятини такомиллаштириш бўйича 7 йиллик дастурни қабул қилиш ва Франция билан бирга Миллий реставрация марказини ташкил этиш режа қилинган.
«Агар ҳозир „Қани, охирги бир ойда қайси театрга бордингиз, қандай янги китоб ўқидингиз?“ деб сўрасам, ўйлайманки, аксарият раҳбарлар хижолат бўлиб қолиши мумкин. Ҳолбуки, раҳбар-етакчилар ижтимоий дунёқараш, маданий савия бўйича бошқаларга ўрнак бўлишлари керак», — деганди у.
