Руминияда президентлик сайловларининг биринчи турида амалдаги бош вазирдан ўзиб кетган ўта ўнг номзод етакчилик қилмоқда, дея хабар берди Deutsche Welle.
Руминия президенти сайловида биринчи турда мустақил номзод Кэлин Жеоржеску кўпчилик овозга эга бўлди, у илгари ўта ўнг «Руминияликларни бирлаштириш учун альянс» аъзоси эди. Бюллетенларнинг 99 фоизи саналганидан сўнг сайлов иштирокчиларининг 22,8 фоизи унга овоз бергани маълум бўлди. У Европа Иттифоқи, НАТО ва АҚШнинг Украинага ҳарбий ёрдамини танқид қиларди, унинг ўзи эса Россия билан яхши алоқада экани учун танқидга қолган, деб ёзади BBC рус хизмати.
Иккинчи натижани (19,3%) бош вазир, Социал-демократик партия етакчиси Марчел Чолаку кўрсатди. Экзитполлар, деб ёзади DW, Чолакунинг ғалабасини эълон қилди.
Якуний маълумотлар душанба куни мамлакатдан ташқаридаги сайлов участкаларида овозларни санаб чиққандан сўнг эълон қилиниши керак. Руминия президенти сайловининг иккинчи тури 8 декабрга белгиланган.
Руминия президенти сайловининг биринчи турида жами 13 нафар номзод иштирок этди. Биринчи турда ғалаба қозониш учун 50% дан ортиқ овоз олиш керак эди. BBC рус хизматининг таъкидлашича, амалдаги бош вазирнинг сайловдан олдинги асосий рақиби «Руминияликларни бирлаштириш учун альянс» етакчиси Жорж Симион эди, у тўртинчи натижани кўрсатди.
Сайловнинг биринчи тури натижаларига кўра учинчи ўринни либерал-консерваторлар вакили Елена Ласкони эгаллади.
Руминия президенти — давлат раҳбари ва мамлакат қуролли кучларининг бош қўмондони. У 5 йил муддатга сайланади ва миллий хавфсизлик ҳамда ташқи сиёсат масалаларида катта ваколатларга эга.
