АҚШ махсус прокурори Жек Смит Вашингтон ва Атланта судларига 2020 йилги сайловларга аралашиш, шунингдек, махфий ҳужжатлар билан тегишлича муомала қилмаслик бўйича ишни тўхтатишни сўраб мурожаат қилди, деб хабар бермоқда CNN ва New York Times.
Смитнинг таъкидлашича, ишлар Адлия вазирлигининг амалдаги президентни судда таъқиб қилишни тақиқловчи сиёсати туфайли ёпилиши керак.
«Адлия вазирлигининг позицияси шундан иборатки, Конституция бу иш жавобгар лавозимга киргунга қадар тугатилишини талаб қилади», — деди Смит ва «ишнинг моҳияти бўйича айблов позицияси ўзгармади, лекин вазият ўзгарди» деб таъкидлади.
Трампнинг вакили Стивен Чунг буни «қонун устуворлиги тамойилининг катта ғалабаси» деб атади. «Америка халқи ва президент Трамп одил судлов тизимимиздан сиёсий фойдаланишга зудлик билан чек қўймоқчи ва биз мамлакатимизнинг бирлашишини интиқлик билан кутмоқдамиз», — дея қўшимча қилди у.
Трампнинг ўзи иккала ҳолатда ҳам барча айбловларни тан олмаган. У, шунингдек, лавозимга киришганидан кейин «икки сония» ичида Смитни ишдан бўшатишга ва унга қарши иш олиб борган прокурорларга нисбатан тергов бошлашга ваъда берган. Смит Трампнинг инаугурациясига қадар истеъфога чиқиш ниятида эканини билдирди.
Шу билан бирга, CNN ва NYT нашрининг таъкидлашича, Смит ўз баёнотида сайланган президентдан айбловларни «асоссиз гумонларга берилмай» олиб ташлашни сўради, яъни бу келажакда Трамп Оқ уйни тарк этгач, айбловларни такроран тақдим этиш имкониятини очиқ қолдиради.
Колумбия округ суди судьяси Таня Чуткан Смитнинг илтимосини қаноатлантирди, аралашув тўғрисидаги иш тўхтатилди.
Бироқ прокурорлар Трампнинг Мар-а-Лаго қароргоҳидан топилган махфий ҳужжатлар билан ножўя муносабатда бўлган Трампнинг икки собиқ ходими Уолт Наута ва Карлос де Оливейрага қарши иш юритишда давом этади.
Умуман олганда, сўнгги бир неча йил ичида Трампга қарши тўртта жиноий иш очилган, улардан иккитаси давом этади, чунки президент штатлар ҳукумати томонидан қўзғатилган ишларга аралашиш ваколатига эга эмас.
Гап порноактриса Сторми Дэниелсга пул тўлаш билан боғлиқ иш ҳужжатларини сохталаштириш ҳақида кетмоқда. Май ойида Нью Йоркдаги суд Трампни айбдор деб топган, аммо ҳукм номаълум муддатга қолдирилган.
Иккинчи иш бўйича Трамп Жоржия штатида 2020 йилги президентлик сайловлари натижаларини бекор қилишга уринганликда айбланмоқда.
