Марказий банк бир фойдаланувчига расмийлаштириладиган банк карталари сонини чеклашни режалаштирмоқда. Бу ҳақда 26 ноябрь куни бўлиб ўтган медиа-мулоқотда регулятор раиси ўринбосари Беҳзод Ҳамраев маълум қилди, дея хабар бермоқда «Spot».
Беҳзод Ҳамраевнинг қайд этишича, ҳозирда Ўзбекистонда фуқаролар битта паспортга очиши мумкин бўлган банк карталари сони қонуний жиҳатдан тартибга солинмаган. Натижада, айрим мижозлар юздан ортиқ карталарга эгалик қилмоқда.
Раис ўринбосари фирибгарлар бундай карталардан кейинчалик пул маблағларини ўзлаштириш схемаларида фойдаланаётганини таъкидлади. Қандай чеклов ўрнатиш таклиф қилинаётгани ҳақидаги саволга регулятор раиси ўринбосари аниқ жавоб бермади.
«Марказий банк мақбул ечим топиш учун мазкур масалани таҳлил қилишни режалаштирмоқда», — деган у.
Марказий банк бошқаруви раиси Мамаризо Нурмуратов 31 октябрь куни бўлиб ўтган матбуот анжуманида Ўзбекистонда онлайн кредитлар бериш бўйича янги чекловлар жорий этилишига изоҳ берганди. Аввал хабар қилинганидек, 1 ноябрдан 2025 йилнинг 1 апрелига қадар онлайн кредит ажратилишига доир вақтинчалик тартиб жорий этилди. Эндиликда фуқаролар кредит ташкилотининг мобиль иловаси орқали кредит ажратиш бўйича ариза юбориш жараёнида биометрик идентификациядан ўтиши талаб этилади (батафсил).
Регулятор раисининг бунга аниқлик киритишича, вақтинчалик тартиб тугагандан сўнг онлайн кредитлар бериш бўйича чекловлар сақланиб қолади.
«Биз банк хизматларининг рақамли бозорини (онлайн-банкинг) ҳаддан ташқари либераллаштириб юборганмиз», — дея Нурмуратовдан иқтибос келтиради Spot. Марказий банк беш ой давомида онлайн тўловлар ва пул ўтказмалари асосини белгиловчи механизмларни такомиллаштириш ҳамда қайта ишлашни режалаштирмоқда, деб ёзади нашр.
МБ раиси ўшанда асосий мақсад — фуқаролар маблағларининг хавфсизлигини таъминлаш эканини таъкидлаганди. У тўлов ташкилотлари ва банкларнинг даромадидан ташқари, маблағларнинг хавфсизлигини таъминлаш зарурлигини ҳам қайд этганди.
