Бир кун аввал Абу-Дабига (БАА) учиб боргач, аэропортдан чиқарилмаган ва у ерда бир суткадан ортиқ қолиб кетган 13 нафарга яқин Ўзбекистон фуқароси Тошкентга қайтиб келди. Бу ҳақда Air Arabia авиакомпаниясининг эрталабки рейсида келган йўловчилардан бири «Газета.uz»га маълум қилди.
Аввал хабар берганимиздек, 30 ноябрь куни соат 1:00 да Тошкентдан Wizz Air авиакомпаниясининг 5W7160 рейси билан учиб борган 31 нафар эркак тушунтиришларсиз бошқа йўловчилардан ажратиб олиниб, паспортлари олиб қўйилган ва ташрифнинг мақсади ҳамда давомийлиги ҳақида сўроқ қилинган. Кейинроқ бошқа рейс билан келган бошқа эркакларнинг ҳам ушлаб турилгани маълум бўлди. Уларнинг умумий сони номаълум.
Ўзбекистоннинг БААдаги элчихонаси вазият назоратда эканини маълум қилди, бироқ йўловчилар дипломатик миссия вакилларини кўрмаганларини ва уларга ҳеч қандай ёрдам кўрсатилмаганини айтди.
Ушлаб турилганлар аэропортда ярим суткадан кўпроқ вақт давомида овқатланмагани, ҳожатхонага миллий гвардиянинг қуролли ходимлари кузатувида борганини билдирди. Улар дим хонада ушлаб турилган, шунингдек, полда ётишга тўғри келган. Уларга паспортлари учиб кетишидан бир соат олдин қайтариб берилган.
Тошкентга қайтганларнинг барчаси чипталарни ўз ҳисобидан сотиб олди. Яна тахминан 10 киши якшанба куни бошқа рейс билан, қолганлари эса кейинроқ келишни режалаштирган.
Баъзилар Самарқандга чипта сотиб олишга мажбур бўлди, чунки бошқа вариант йўқ эди, деди йўловчилардан бири.
«Қўлга олишлар айнан Абу-Дабида содир бўлмоқда, — деди Тошкентга қайтиб келган эркак. — Биз билан бирга ёки кейинроқ Дубайга учиб келган танишларимиз ҳеч қандай муаммога дуч келмади».
«Ҳеч ким — элчихонамиз ҳам, миллий гвардия ҳам, қўриқлаш хизмати ҳам, иммиграция хизмати ҳам ҳибсга олиш сабабини айтмади. Кейинроқ биз буни раввиннинг ўлдирилиши билан боғлиқ бўлиши мумкинлигини тахмин қилдик», — деди у.
25 ноябрь куни БАА Ички ишлар вазирлиги уч нафар Ўзбекистон фуқароси 28 ёшли исроиллик раввин Зви Коганни ўлдиришда гумонланаётгани ҳақида хабар берди. У бундан бир неча кун олдин Дубайда бедарак йўқолган ва Ўмон билан чегарадош Ал-Айн шаҳрида ўлик ҳолда топилган.
«Совуқда ухладик, баъзиларимиз ёмон ҳолда қолдик, ҳеч қандай ёрдам ёки инсоний муносабат кўрмадик. Эҳтимол, элчихона аэропорт маъмуриятидан хабар берилгани сабабли бизда ҳаммаси яхши деб ўйлаган, аммо бундай эмасди», — деди суҳбатдош.
