Ўзбекистонда қиш мавсумига тайёргарлик кўришда йўл қўйилган хатолар учун бир қанча раҳбарлар интизомий жавобгарликка тортилди. Бу ҳақда бош вазир матбуот котиби Бекзод Ҳидоятов маълум қилди.
Унинг сўзларига кўра, ҳукумат раҳбари Абдулла Арипов «қиш мавсумига тайёргарлик кўриш ва уни беталафот ўтказиш, истеъмолчиларга ёқилғи-энергия ресурсларини барқарор етказиб бериш ҳамда уларни тежаш бўйича берилган топшириқлар ижросини таъминлашда сусткашликка йўл қўйган» айрим раҳбарларнинг шахсий масъулиятини ошириш бўйича фармойиш қабул қилган.
Хусусан, электр энергияси ва табиий газни тежаш бўйича белгиланган режаларга риоя этмагани, энергия ресурсларидан фойдаланиш лимитларини ошириб юборгани (тежамкорлик режалари ва лимитлари очиқ ҳолда мавжуд эмас) ва етарлича назорат ўрнатмагани учун қуйидаги ҳокимларга ҳайфсан эълон қилинди:
- Комилжон Эрназаров — Сирдарё вилояти Оқолтин тумани ҳокими;
- Ориф Раҳмонқулов — Сирдарё вилояти Мирзаобод тумани ҳокими;
- Жўрабек Ахмедов — Тошкент вилояти Бўстонлиқ тумани ҳокими;
- Шуҳрат Дусбеков — Тошкент вилояти Бекобод тумани ҳокими;
- Эркин Рустамов — Тошкент вилояти Зангиота тумани ҳокими;
- Сардор Эргашев — Тошкент тумани ҳокими;
- Одилжон Атауллаев — Янгийўл тумани ҳокими;
- Маъруф Усмонов — Фарғона вилояти Қўқон шаҳри ҳокими;
- Ғанихон Солиев — Фарғона вилояти Бағдод тумани ҳокими;
- Расулжон Жураев — Фарғона вилояти Бешариқ тумани ҳокими;
- Сайидбаҳром Сайидмусаев — Фарғона вилояти Сўх тумани ҳокими;
- Элорбек Асронқулов — Фурқат тумани ҳокими.
Бундан ташқари, Қорақалпоғистон сув хўжалиги вазири Бахтиёр Жузбоев, Андижон вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Комилжон Комилов, Наманган вилояти ҳокимининг ҳам шу масалалар бўйича ўринбосари Ғуломжон Муродхўжаев, Тошкент вилояти ҳокими ўринбосари Бобурбек Султонбеков, Андижон тумани ҳокими Бобирбек Юлдашев ва Беруний тумани ҳокими Икром Хидировга электр энергияси ва табиий газ талон-торож қилинишига йўл қўйгани учун ҳайфсан эълон қилинди.
«Ўзбеккўмир» АЖ бош директори ўринбосари Эркин Ёқубовга кўмирни аҳоли ўртасида тақсимлашда кечикиш ва сифатсиз кўмирни тарқатиш ҳолатлари кўплиги ва бу жараён устидан етарли назорат ўрнатилмагани учун «охирги марта огоҳлантириш» берилди.
Фармойишда тегишли вазирлик ва идораларга мазкур шаҳар ва туманлар сектор раҳбарлари фаолиятига баҳо бериб, тегишли чора-тадбирлар кўриш ва натижаси бўйича бир кун муддатда Вазирлар Маҳкамасига ахборот бериш топширилди.
Куз-қиш мавсумида Ўзбекистон истеъмолчиларига 21 млрд куб метр газ етказиб бериш режалаштирилган, дейилади президентнинг 15 ноябрдаги йиғилишида. Кескин совиш ҳолатида ҳаракат режаси ва ижтимоий муассасаларни узлуксиз энергия билан таъминлаш чоралари ишлаб чиқилган. Ҳудудларда газни тежаш имкониятларини ишга солиш бўйича топшириқлар берилган.
Аввалроқ энергетика вазири Жўрабек Мирзамаҳмудов куз-қиш мавсумига тайёргарлик доирасида базавий ва пессимистик сценарийлар ишлаб чиқилганини маълум қилганди. -20 даражадан юқори ҳароратда йирик истеъмолчилар ва ёнилғи қуйиш шохобчалари учун газ таъминоти чекланади, мазутдан фойдаланиш кўпайтирилади, йирик корхоналарга энергия ресурслари етказиб бериш чекланади ва бошқалар.
Бироқ шу пайтгача ушбу сценарийлар жамоатчиликка тақдим этилмаган.