2 декабрь куни ташқи ишлар вазирининг биринчи ўринбосари Бахромжон Аълоев БАА элчиси Саид Матар ал-Қамзийни қабул қилди, деб хабар қилди ТИВ матбуот хизмати.
Томонлар сўнгги кунларда Абу-Даби аэропортида Ўзбекистон эркак фуқароларининг ушлаб турилиши билан боғлиқ вазиятни муҳокама қилди.
«Мавжуд ҳолатни имкон қадар қисқа муддатларда ҳал қилиш бўйича тегишли чора-тадбирлар кўришга келишиб олинди», — дейилади хабарда.
Учрашувда икки давлат ўртасидаги сиёсий, савдо-иқтисодий ва сармоявий алоқаларни ривожлантириш масалалари ҳам муҳокама қилинди.
«Газета.uz» 30 ноябрдан бери Абу-Даби аэропортидаги чегара хизмати якка тартибда етиб келган ёш йигитларнинг мамлакатга киришига йўл қўймаганини ёзганди.
Тошкентдан учган рейслардан биридаги 31 эркак қўлга олинган. Уларнинг паспортлари олиб қўйилиб, 15 соат овқатсиз ушлаб турилган ва ташриф мақсади ҳақида сўроқ қилинган. Сўнг улар мамлакатни тарк этишга мажбур қилинган. Бошқа рейсларда ҳам ҳибсга олинганлар бўлган. Ҳибсга олинганларнинг бир қисми аллақачон Абу-Дабига рейслар амалга ошириладиган Тошкент ва Самарқандга қайтган.
Биз вазият ҳақида Тошкент аэропортида Wizz Air вакили билан интервью эълон қилдик.
Ҳозирча ҳибсга олиш сабаблари ҳақида расмий баёнот берилмаган.
