Украина президенти Владимир Зеленский Украина армияси Россия томонидан босиб олинган ҳудудларни, шу жумладан, Қримни озод қилиш учун етарли ресурсларга эга эмаслигини тан олди. Бу ҳақда у Kyodo News нашрига берган интервьюсида айтиб ўтди.
«Бизнинг армиямиз буни амалга ошириш учун етарли кучга эга эмас, бу — ҳақиқат. Биз ҳақиқатан ҳам дипломатик ечим топишимиз керак», — деди Зеленский.
Украина бундай қадамни «етарли даражада кучли эканини тушунганидан кейингина» кўриб чиқади, шунда Россия янги босқинни бошламайди, дея қўшимча қилди Украина раҳбари Украинани НАТОга таклиф қилишга яна бир бор чақириб. Аввалроқ Зеленский ўз мамлакатининг НАТОга аъзолигини Россия билан урушни тўхтатишнинг ягона йўли деб атаган эди.
Интервьюда Зеленский, шунингдек, сайланган президент Дональд Трамп лавозимга киришганидан кейин АҚШнинг қўллаб-қувватлаши масаласини ҳам муҳокама қилди. Сайловолди кампанияси давомида Трамп АҚШнинг Украинага кўрсатаётган ҳарбий ва молиявий ёрдами кўламини бир неча бор танқид қилган ва урушни январь ойида инаугурациясидан олдин тўхтатишга ваъда берган, бироқ буни қандай амалга оширишни режалаштираётганини айтилмаган.
Зеленскийнинг сўзларига кўра, Трамп ва унинг жамоаси Украинанинг позициясини билади ва Украина раҳбари илгари тақдим этган «ғалаба режаси»ни ўрганмоқда.
«Улар режани ўрганмоқда ва биз уларнинг фикрини кутмоқдамиз. Аммо Украина таслим бўлмайди», — деди у. «Бу факт ва, мен ўйлайманки, у [Трамп] буни тушунади».
Зеленский аввалроқ урушда ҳарбий жиҳатдан ғалаба қозониш мумкин эмаслиги ҳақида гапирган эди. «Биз Украинанинг бирорта ҳам оккупация қилинган ҳудудини Россияники деб тан ололмаймиз. Гап [шу жумладан] 2014 йилдан буён Путин томонидан тўлиқ босқингача босиб олинган ҳудудлар ҳақида кетмоқда. Юридик жиҳатдан биз буни тан олмаймиз, буни қабул қилмаймиз. Бошқа томондан, биз ҳали ҳам Путинни 1991 йилдаги чизиқларга улоқтириш учун етарли кучга эга эмаслигимизни тушунамиз», — деди Зеленский ноябрь ойида Fox News нашрига берган интервьюсида.
Телеканал журналисти Зеленскийдан «ушбу урушга чек қўйиш ва Европада қон тўкилишини тўхтатиш мақсадида» тинчлик келишуви учун Қримдан воз кечишга тайёрмисиз, деб сўради.
«Биз Қримни дипломатик йўл билан қайтаришга тайёрмиз, деб айтдим. Биз Қримни қайтариш учун ўн минглаб одамларимизнинг ҳаётини сарфлай олмаймиз. Биз Қримни дипломатик йўл билан қайтариш мумкинлигини тушунамиз», — деди Украина президенти.
BBC рус хизматининг таъкидлашича, деярли уч йиллик кенг кўламли уруш давомида Зеленскийнинг ўзи ҳам, унинг вакиллари ҳам 1991 йил чегараларига қайтиш мақсади ҳақида гапиришган, аммо сўнгги пайтларда бу тезис фронтдаги мураккаб вазият ва Украина жамиятининг чарчоғи фонида камроқ янграй бошлади.
