Ўзбекистон Филиппин билан Жаҳон савдо ташкилотига аъзо бўлиш бўйича икки томонлама музокараларни якунлади. Бу ҳақда 1 декабрь куни президентнинг ЖСТ масалалари бўйича махсус вакили Азизбек Урунов ўзининг LinkedIn саҳифасида маълум қилди.
Филиппин Ўзбекистон билан ташкилотга аъзо бўлиш бўйича икки томонлама музокараларни якунлаган 23-мамлакат бўлди. Урунов ва республиканинг ЖСТдаги элчиси Тиханки МануЭл 1 декабрь куни Женевада бўлиб ўтган учрашувда протоколни имзоладилар. Маросимда ЖСТ бош директори ўринбосари Чжан Сянчен ҳам иштирок этди.
«Мен Женевада билган энг яхши элчилардан бирига ушбу натижага эришиш учун иштирок этгани, қўллаб-қувватлагани ва биргаликда ишлагани учун миннатдорчилик билдирмоқчиман. Ўзбекистон-Филиппин музокара гуруҳларига алоҳида миннатдорчилик билдираман — биз буни биргаликда амалга оширдик,» — деб ёзди Азизбек Урунов.
Президентнинг махсус вакили Филиппин сўнгги икки ой ичида Ўзбекистон музокараларни якунлаган тўртта давлатдан бирига айланганини қўшимча қилди. Булар орасида Эл-Салвадор, АҚШ ва Хитой бор.
Азизбек Урунов ноябрь ойи бошида Ўзбекистонда бўлиб ўтган Европа иқтисодиёти кунларида расмий Тошкент Россия, Европа Иттифоқи, Буюк Британия, Швейсария ва бошқа давлатлар билан музокараларни якунлаши кераклигини таъкидлаган эди.
Август ойида тадбиркорлар билан учрашувда президент Шавкат Мирзиёев ЖСТга аъзо бўлишни «чуқур ўйланган ва узоқни кўзлаган танлов, қолаверса, ислоҳотларнинг ажралмас бир қисми» деб атади. Илгари мамлакат иқтисодиётига «протекция қайсидир маънода керак эди», аммо бу йўлдан боришда давом этса, Ўзбекистоннинг имкониятлари чекланади, деди у.
Бош вазир ўринбосари Жамшид Ходжаев май ойида Ўзбекистон 2026 йилда Камерунда бўлиб ўтадиган 14-вазирлар конференциясига қадар Жаҳон савдо ташкилотига қўшилиш ниятида эканини маълум қилган эди.
