Шавкат Мирзиёев 27 ноябрь куни «Давлат харидлари тўғрисида»ги Ўзбекистон Республикаси Қонунига давлат харидлари тизимини янада такомиллаштиришга қаратилган қўшимча ва ўзгартиришлар киритиш ҳақида»ги қонунни имзолади.
Маълум қилинишича, ушбу қонун билан кичик қийматли харид учун соддалаштирилган тартиб-таомил ва икки босқичли давлат харидлари каби харид қилиш тартиб-таомилларининг янги турлари жорий этилишини назарда тутувчи қўшимча ва ўзгартиришлар киритиляпти.
Ўзгартириш ва қўшимчалар қуйидагилардан иборат:
- харид тартиб-таомилларининг янги турларини (кичик қийматли хариднинг соддалаштирилган тартиби, икки босқичли давлат харидлари) жорий этиш;
- барқарорлик принципи, марказлаштирилган давлат харидларини амалга ошириш механизми, доиравий келишувни тузиш ва амалга ошириш тартибини белгилаш;
- давлат харидлари соҳасидаги шикоятларни кўриб чиқишда манфаатлар тўқнашувининг олдини олиш чоралари.
Қайд этилишича, барқарорлик принципи, марказлашган давлат харидларини амалга ошириш механизми, ҳадли келишувни тузиш ва амалга ошириш тартиби, шунингдек давлат харидлари соҳасидаги шикоятларни кўриб чиқиш чоғидаги манфаатлар тўқнашувининг олдини олиш бўйича чоралар ҳамда бошқа масалалар белгиланади.
Шундай қилиб, икки босқичли давлат харидлари деганда бир шартнома бўйича маълум қийматдаги техник жиҳатдан мураккаб товарлар (ишлар, хизматлар)нинг давлат харидларини амалга оширишнинг икки ўзаро боғлиқ босқичда ўтказиладиган рақобатбардош усули тушунилади.
Энди бир нечта давлат буюртмачилари бир хил турдаги товарлар (ишлар, хизматлар)ни марказлаштирилган харид органи орқали марказлаштирилган тарзда харид қилишлари мумкин. Бу орган Вазирлар Маҳкамаси томонидан белгиланади. Марказлаштирилган харид органи томонидан харид қилинадиган товарлар (ишлар, хизматлар) рўйхати махсус ахборот порталида эълон қилинади.
Шунингдек, давлат буюртмачиси энг яхши таклифларни танлаш ёки тендер натижалари бўйича аниқланадиган бир нечта ғолиблар билан 1 йилдан 3 йилгача муддатга доиравий келишув тузиши мумкин.
Давлат харидлари тизими жамият ва иқтисодиёт учун ўта муҳим аҳамиятга эга бўлиб, унинг шаффофлиги давлат маблағларининг самарали сарфланишини таъминлайди. Халқаро тажрибага кўра, давлат харидларининг самарали бошқарилиши коррупциянинг олдини олишда ва бюджет маблағларини оқилона тақсимлашда ҳал қилувчи аҳамиятга эга. Шу боис янги тартиб-таомиллар ва барқарорлик принципининг жорий этилиши давлат ресурсларидан фойдаланишда масъулиятни янада оширади, дейилади ҳужжатда.
Бир шартнома бўйича БҲМнинг 50 бараваридан кўп бўлмаган суммадаги (бюджет буюртмачилари учун БҲМнинг 25 бараваридан кўп бўлмаган суммадаги) давлат харидлари харид комиссиясининг иштирокисиз, лекин бир молия йили давомида бир корпоратив буюртмачи учун БҲМнинг 1000 бараваридан кўп бўлмаган сумма ва бир молия йили давомида бир бюджет буюртмачи учун БҲМнинг 500 бараваридан кўп бўлмаган суммага ўтказилиши мумкин.
Бунда ғолиб давлат буюртмачиси томонидан очиқ ахборот манбаларидан олинган нархларни таққослаш ёки давлат харидларини ўтказиш тўғрисида эълон жойлаштирмасдан товарлар (ишлар, хизматлар)нинг камида 3 та потенциал етказиб берувчисидан нархларни сўраш орқали аниқланади.
