BBC нашри дунё бўйлаб катта таъсирга эга ва илҳомлантирувчи 100 нафар аёлнинг рўйхатини шакллантирди. 2024 йилги рўйхатдан бахтсиз ҳодиса ортидан 2 оёғидан айрилган деновлик тикувчи ва тадбиркор Дилором Йўлдошева ҳам ўрин олди.
Нашр берган маълумотга кўра, 2022 йилда Сурхондарё вилоятининг Денов туманида яшовчи Дилором Йўлдошева ўрим-йиғим пайтида бахтсиз ҳодиса туфайли икки оёғидан айрилган. У янги касб-ҳунарларни ўрганиш баробарида пул топишлари учун ўзбекистонлик ёш хотин-қизларга ҳам кўмаклашмоқчи бўлган, шу боис ўзининг тикувчилик бизнесини очишга қарор қилган.
«У тадбиркорлик ва ресурсларни бошқариш асосларини ўрганди. 40 дан ортиқ шогирд тайёрлади. Бир неча ойнинг ўзида бизнеси сезиларли даражада ўсди. Бепул машғулотлар ўтказа бошлади. Ишчилар ва мактаб ўқувчилари учун кийим-кечак ишлаб чиқариш бўйича шартномалар тузди. Ўшандан бери унинг бизнеси ўзи ва бошқа ўнлаб аёллар учун даромад манбаига айланди», — дея келтирилади аёлга берилган таърифда.
Эслатиб ўтамиз, Адлия вазирлиги, қатор нодавлат-нотижорат ташкилотлар ва ҳомийлар иштирокида Дилором Йўлдошева ҳақида «Матонат» номли фильм ишлаган. Унда аёлнинг матонати ҳақида ҳикоя қилиш баробарида бу ҳаётда имконсиз нарсанинг ўзи йўқлигини кўрсатилади.
Шунингдек, Дилором Йўлдошевадан олдин 2017 йилда тузилган «100 аёл» рўйхатида Қарши шаҳридаги 2-ихтисослаштирилган умумий ўрта таълим мактаб-интернатининг математика фани ўқитувчиси Мухаббат Шарапова ҳам бўлган.
2024 йилги бардошли аёллар рўйхатида тинчлик бўйича Нобель мукофоти совриндори Надя Мурад, актриса Шэрон Стоун, спортчилардан Париждаги Олимпия Ўйинларининг финалигача чиқиб, аммо вазн ўлчаш босқичидан ўтолмай ўйинлардан четлатилган ҳиндистонлик курашчи Винеш Фогат, совуққон кўриниши билан тармоқлар юлдузига айланган ўқ отувчи Олимпиада совриндори жанубий кореялик Ким Йежи, шунингдек, нигериялик иқлим бўйича адолат ҳимоячиси Аденике Титилопе Оладосулар ҳам бор.
Келтирилишича, BBC «100 Аёл» жамоаси изланишлар натижасида тўпланган, 41 тил хизмати ва BBC Media Action томонидан таклиф қилинган номлар асосида қисқа рўйхат тузади. Сўнгги 12 ой ичида сарлавҳаларга чиққан ёки муҳим воқеаларга таъсир қилган, чиқмаган бўлса-да, илҳомлантирувчи ҳикоялари бор ёки катта муваффақиятларга эришган ва ўз жамиятида ўзгаришлар қилаётган аёлларга эътибор қаратилади. 2024 йилдаги номзодлар бардошлилик мавзусига мувофиқ танланган.
«Биз кечаётган йил бутун дунё аёллари учун қанчалик оғир бўлганини эътироф этмоқчи бўлдик. Шу боис, чидам билан ўз жамоаларида ёки бутун дунёда ўзгаришлар қилаётган аёлларга эътибор қаратдик», — дейди лойиҳа муаллифлари.
