Германия канцлери Олаф Шольц Украинага 2 декабрдаги ташрифи чоғида мамлакатга янги ҳарбий ёрдам кўрсатишини эълон қилди ва у Россия президенти Владимир Путинга Берлин урушда қанча керак бўлса, шунча вақт Киев билан бирга бўлишини айтди. Бу ҳақда Reuters ёзмоқда.
Қайд этиш керакки, бу унинг Украинага қиладиган камдан кам ташрифларидан биридир, у сўнгги бор Киевга икки ярим йил аввал — 2022 йил июнда келганди. Навбатдаги ташриф Дональд Трампнинг Оқ уйга қайтиши арафасида ва Шольцнинг Берлиндаги бошқарув коалицияси қулаганидан бир неча ҳафта ўтиб содир бўлмоқда.
«Европанинг энг йирик иқтисодиёти бўлган Германиядаги сиёсий вазият Украинадаги ноаниқлик ҳиссини кучайтирмоқда, рус қўшинлари шарқда тобора тезроқ ҳаракат қилмоқда. Агар Трамп Украинага энг қудратли иттифоқчиси бўлган АҚШнинг ёрдамини тўхтатса, Киевнинг европалик ҳамкорлари Украинага қанчалик ёрдам бериши мумкинлиги номаълум», — дейилади хабарда.
«Киевдан Путинга хабарим: биз бу билан узоқ муддат машғул бўламиз. Бизнинг Украинани қўллаб-қувватлашимиз сусаймайди. Биз Украина халқини қанча керак бўлса, шунча қўллаб-қувватлаймиз», — деб ёзди Шольц X саҳифасида.
Шольц сафари чоғида шу ойда 650 миллион евро (682,37 миллион доллар) қийматидаги қўшимча ҳарбий ёрдамлар етказиб берилишини эълон қилди. Пакетга IRIS-T ҳаво ҳужумидан мудофаа тизимлари, Leopard 1 танклари ва қуролланган дронлар киради.
Украина президенти Владимир Зеленский ўз видеомурожаатида Шольц билан музокаралар икки ярим соатдан кўпроқ давом этганини айтди.
«Канцлер билан учрашувимиз чоғида Германия глобал сиёсатда нима бўлишидан ёки кайфият қандай ўзгаришидан қатъи назар, Украинани керак бўлганда қўллаб-қувватлашда давом этишига келишиб олдик», — деди у.
Шольц ва Зеленский Украина ва Германия фирмалари томонидан ишлаб чиқарилган дронларни кўздан кечирди, шифохонага ташриф буюрди ва яраланган ҳарбий хизматчилар ҳамда тиббиёт ходимлари билан суҳбатлашди.
Германияни Украинанинг АҚШдан кейинги иккинчи йирик қурол-яроғ етказиб берувчиси сифатида эътироф этган Шольц, бу унинг мамлакатини Россия билан тўғридан-тўғри можарога олиб келиши мумкинлигидан қўрқиб, Украинага Taurus ракеталарини юборишдан бир неча бор бош тортган, дейди Reuters.
Зеленский қўшма матбуот анжуманида Украина йигирмата «махсус» объектни ҳимоя қилиш учун кўпроқ ҳаво мудофаасига муҳтожлигини айтди. «Биз Taurus масаласида бир фикрга келиш устида ишлаяпмиз», — деди у.
- Германия канцлери Олаф Шольц ва Россия президенти Владимир Путин 15 ноябрь куни икки йил ичида илк бор телефон орқали мулоқот қилганди. ОАВ маълумотларига кўра, уларнинг суҳбати бир соатга яқин давом этган. Кремлдагилар суҳбатни «иш юзасидан, батафсил ва жуда очиқ» деб таърифлаган. 2 декабрь куни Киевга ташрифи чоғида Шольц Путин билан суҳбатда «Украина мустақил, суверен, демократик давлат бўлиш ҳуқуқига эга» эканини аниқ англатганини айтди.
