Жанубий Корея президенти Юн Сок Ёль YTN телеканали орқали тўғридан-тўғри эфирга узатилган мурожаатида ҳарбий ҳолат жорий этилганини эълон қилди. Бу ҳақда Reuters хабар бермоқда. Мамлакатда охирги марта ҳарбий ҳолат 1980 йилда эълон қилинган.
Сиёсатчининг ўзи бу Шимолий Кореяга хайрихоҳ кучларни йўқ қилиш ва конституциявий тартибни сақлаш учун кераклигини таъкидлади.
Yonhap маълумотларига кўра, сиёсатчи йиғилишда ўзига қарши импичмент процедурасини ўтказишга уринишлар туфайли «ҳокимият фалаж бўлиши хавфи» борлигини айтган. Жанубий Корея президенти (2022 йилда «Халқ кучи» партиясидан сайланган) парламентни назорат қилувчи Демократик партиядан бўлган мухолифларни Шимолий Кореяга хайрихоҳликда ва ҳукумат ишини фалаж қилаётган давлатга қарши фаолиятда айблади.
«Мен озод Корея Республикасини Шимолий Кореянинг коммунистик кучлари таҳдидидан ҳимоя қилиш, халқимизнинг озодлиги ва бахт-саодати ҳамда конституциявий тартибга тажовуз қилувчи давлатга қарши принципсиз Шимолий Корея кучларини зудлик билан йўқ қилиш учун ҳарбий ҳолат эълон қиламан», — деган президент миллатга мурожаатида.
Yonhap ва Reuters нашрининг ёзишича, парламентда кўпчиликка эга бўлган мухолифат Демократик партия ҳукуматнинг бюджет бўйича таклифини рад этиб, давлат аудитори ва бош прокурорга импичмент эълон қилишга қарор қилганидан кейин Юн Сок Ёль шундай қарорга келган.
Президент ўз мурожаатида июнь ойида ҳукумат инаугурациясидан бери Миллий Ассамблея 22 нафар давлат хизматчиси, жумладан, ички ишлар вазири ва мудофаа вазирига импичмент билан таҳдид қилганини таъкидлади.
У, шунингдек, мухолифатни гиёҳванд моддалар савдосига қарши кураш ва жамоат хавфсизлигини қўллаб-қувватлашдан тортиб, болалар нафақаларигача бўлган энг муҳим харажатлар учун бюджетни қисқартиришда айблади.
«Миллий мажлисимиз жиноий гуруҳлар маконига айланди ва қонунчилик диктатураси орқали мамлакат суд-маъмурий тизимини фалаж қилишга ва либерал демократия тизимини ағдариб ташлашга уринмоқда», — дейилади президент баёнотида.
Ҳарбий ҳолат доирасида қандай чоралар кўрилишига аниқлик киритилмади.
«Бу нафақат дунёнинг ҳар қандай мамлакати учун, балки мамлакатимиз ташкил этилганидан бери мисли кўрилмаган ҳодиса», — деди у.
Ҳарбий ҳолат жорий этилгандан сўнг иш бошлаган ҳарбий қўмондонлик мамлакатда ҳар қандай сиёсий фаолият, жумладан, норозилик намойишлари ва сиёсий партиялар фаолияти тўхтатилганини эълон қилди. Шунингдек, барча ОАВ ва нашриётлар устидан назорат ўрнатилди.
Yonhap`нинг таъкидлашича, парламент биносига кириш полиция ва ҳарбийлар томонидан тўсиб қўйилган.
Демократик партия етакчиси Ли Же Мён ҳарбий ҳолат жорий этилишини Конституцияга зид деб атади, президентнинг «Халқ кучи» партияси раҳбари Хон Дон Хун эса буни «нотўғри» деб атади ва қарорни блоклашни ваъда қилди.
Ли Же Мён ҳам тарафдорларини Миллий Ассамблея биносига келишга чақирди. SBS жонли эфиридаги кадрларда парламент, полиция ва одамлар тепасида айланиб юрган вертолётлар кўринади.
Сеулдаги парламент биноси олдида. SBS жонли трансляцияси кадри.
- Жанубий Корея президенти қайта сайланиш ҳуқуқисиз умумий тўғридан тўғри овоз бериш орқали беш йил муддатга сайланади. Президент ҳукуматга бошчилик қилади ва Жанубий Корея Қуролли кучларининг олий бош қўмондони лавозимини эгаллайди. Сок Ёль 2022 йил 10 майда президент этиб сайланган.
