Намибиянинг амалдаги вице-президенти, Жанубий-Ғарбий Африка Халқ Ташкилотининг (Swapo) раҳбари Нетумбо Нанди-Ндаитва 27 ноябрь куни бўлиб ўтган баҳсли сайловлардан сўнг мамлакатнинг биринчи аёл президенти этиб сайланди, деб ёзди BBC.
У февралда Хаге Гейнгоб саратон касаллигидан вафот этганидан кейин янги президент сифатида қасамёд қилган Нанголо Мбумбанинг ўрнини эгаллайди.
Сайлов комиссиясининг маълум қилишича, у 57 фоиздан ортиқ овоз олган, унинг потенциал рақиби Пандулени Итула эса 26 фоиз овоз тўплаган. Сайловда 15 нафар номзод иштирок этган. Биринчи турда ғалаба қозониш учун овозларнинг ярмидан кўпи ва битта овоз керак бўлган.
Логистик муаммолар ва мамлакатнинг баъзи ҳудудларида овоз бериш уч кунга узайтирилганидан сўнг Итула сайлов жараёни «нуқсонли» бўлганини айтди. Унинг «Ўзгариш учун мустақил ватанпарварлар» (IPC) партияси судда натижаларга эътироз билдиришини таъкидлади.
Аксарият мухолифат партиялар пойтахт Виндхукда эълон қилинган натижаларни бойкот қилди. Хабар қилинишича, чоршанба куни Виндхук тинч, байрамлар ҳам, норозилик намойишлари ҳам йўқ ва одамлар нормал ҳаёт тарзини давом эттирмоқда.
Ғалабаси эълон қилинганидан сўнг, Нанди шундай деди: «Намибия халқи тинчлик ва барқарорлик учун овоз берди».
Swapo 1990 йилда мустақилликка эришганидан бери жанубий Африканинг катта, аммо аҳолиси кам бўлган мамлакатида ҳокимиятни эгаллаб келмоқда. Партия арбоби Нанди-Ндаитва чорак аср давомида юқори ҳукумат лавозимида ишлаган ишончли етакчи саналади. Нанди-Ндаитва 72 ёшда бўлиб, У СССРда таълим олган ва «Коммунистик ёшлар ҳаракати иши ва амалиёти» мутахассислиги бўйича дипломга эга.
Аввалроқ Нетумбо Нанди-Ндаива умумий сайловда ғалаба қозонган тақдирда, иқтисодий ривожланиш масалаларига устуворлик беришини маълум қилган.
