Тошкентнинг «Пахтакор» футбол клубига португалиялик мутахассис Педро Морейра мураббий этиб тайинланди. Бу ҳақда 4 декабрь куни клубнинг кейинги режаларига бағишланган матбуот анжуманида маълум қилинди.
Янги бош мураббий билан шартнома «1+1» схемаси бўйича — бир йилга, яна бир йилга узайтириш имконияти билан тузилган. Унга тўртта ассистент ёрдам беради.
«Пахтакор» президенти Жаҳонгир Ортиқхўжаевнинг айтишича, 2022 йилнинг июнь ойидан буён жамоани бошқарган Максим Шацких энди клуб раисининг маслаҳатчиси сифатида ишлайди.
Ортиқхўжаевнинг таъкидлашича, Аббосбек Файзуллаев, Азиз Турғунбоев, Ҳожимат Эркинов каби кўплаб тажрибали футболчи ва юлдузлар жамоани тарк этган ва бу мавсумни ёш футболчилар билан ўтказишга қарор қилинган. Шацких ёш футболчилар билан чемпионатда ғалаба қозониш қийин бўлиши ҳақида огоҳлантирган, шунинг учун бу мавсумда бундай вазифа қўйилмаганди, деди клуб президенти.
Унинг таъкидлашича, клубнинг бошқа ёш тоифаларидаги барча тўртта ёшлар жамоаси Ўзбекистон чемпионига айланган.
«Биз бунинг учун Максим Шацкихга миннатдорчилик билдирамиз. Шацких клубдан кетмади, бу истеъфо эмас. У бош мураббий лавозимидан кетди, лекин директорлар кенгашида менинг маслаҳатчим бўлиб қолмоқда», — деди у.
Жаҳонгир Ортиқхўжаевнинг сўзларига кўра, янги мураббий олдига чемпионликни қўлга киритиш вазифаси қўйилган. Мутахассиснинг шартномасида иш ҳақини ошкор қилишни тақиқловчи банд кўрсатилган.
«У қандай бўлишидан қатъи назар, ҳалол ишлаши керак. Унинг ишига ҳеч ким аралашмаслиги керак. Биз уни ўзбеклаштириб, бир ҳафтадан кейин чойхонадан чиқолмайдиган қилиб қўймаслигимиз керак», — деди Ортиқхўжаев.
У, шунингдек, жамоанинг энг яхши ҳужумчиси Драган Черан клубни тарк этишини эълон қилди. 37 ёшли сербиялик футболчи 2018 йилдан буён «Пахтакор» сафида 151 та ўйинда майдонга тушиб, 99 та гол урган.
«Черанга маслаҳатим — фаолиятини якунлаб, мураббийлик билан шуғулланиш. У 38 ёшда ва у бизнинг талабларимизга жавоб бермайди, шунинг учун кейинги мавсум учун режаларимизда йўқ. Чераннинг мухлислар билан видолашуви? Мухлис йўқ-ку, ҳаммаси бўлиб 500 нафар одам келадими йўқми?», — деди клуб президенти.
Бундан ташқари, Жаҳонгир Ортиқхўжаев келгуси йил баҳорида «Пахтакор» стадионини реконструкция қилиш бошланишини маълум қилди. У ФИФА стандартларига мувофиқлаштирилади.
Педро Морейра стадион лойиҳаси унга ёқганини ва жамоага янги услуб ва ғояларни олиб келишни режалаштираётганини айтди.
«Ғояларим ва фалсафам «Пахтакор»нинг қарашларига тўғри келди. Биз ҳар бир ўйинда ғалаба учун ишлаймиз. Мақсадимиз — ОФК Чемпионлар лигаси элитасига қайтиш. Мен ўз ғояларим билан жамоага ёрдам бермоқчиман. Майдонда ҳамма нарсани ўйинчилар ҳал қилади. Албатта, чемпионлик учун курашамиз», — деди янги бош мураббий.
Жорий йилги Ўзбекистон чемпионати 30 ноябрь куни якунланди. Унинг ғолиби тарихда илк бор Қарши «Насаф» жамоаси бўлиб, 26 ўйинда 52 очко жамғарди. Иккинчи ўринни ОКМК (47), учинчи ўринни «Сўғдиёна» (43) эгаллади. «Пахтакор» шу вақтгача кетма-кет бешта чемпионликни қўлга киритган бўлса-да, бу мавсум олтинчи ўринни эгаллади (38).
Педро Морейра асосан «Порту,» «Брага,» «Шахтёр Донецк,» «Рома» каби клубларда мураббий Паул Фонсеcанинг ёрдамчиси бўлиб ишлаган. 2022 йилдан бошлаб у Португалия чемпионатининг иккинчи лигасида Португалиянинг «Торренси» жамоасида мустақил мураббийлик фаолиятини бошлаган.
