Жанубий Кореяда қарийб олти соат олдин жорий қилинган ҳарбий ҳолат парламент қарори билан бекор қилинади. Бу ҳақда мамлакат президенти Юн Сок Ёль маълум қилди, дея хабар берди Reuters.
У Вазирлар маҳкамасининг навбатдаги йиғилишида бекор қилинади, дея қўшимча қилди президент. Ҳарбийлар Миллий ассамблея (парламент) ҳудудидан олиб чиқилади.
3 декабрь оқшомида Юн Сок Ёль ҳарбий ҳолат жорий этилганини эълон қилди ва буни конституциявий тузумни «коммунистик кучлар»дан ҳимоя қилиш зарурати билан изоҳлади. Унинг сўзларига кўра, у бу чорага мамлакатни инқирозга олиб келмоқчи бўлган мухолифат ҳаракатлари сабаб қўл урган.
Бир неча соатдан кейин парламент ҳарбий ҳолатни бекор қилишга овоз берди. Овоз беришда 300 нафар депутатдан 190 нафари қатнашди.
