155 дақиқа — сешанба куни кечқурун Корея Республикаси президенти Юн Сок Ёль томонидан ҳарбий ҳолат эълон қилиниши ва Миллий Ассамблея (парламент) томонидан уни бекор қилиш учун овоз бериш ўртасида худди шунча вақт ўтди.
Сеулда ҳарбий ҳолат эълон қилингандан сўнг, совуқ бўлишига қарамай, одамлар, асосан, президентнинг истеъфосини талаб қилиб, парламент олдида йиғила бошлади. Улар бинога махсус кучларни киритмасликка ҳаракат қилди. Махсус кучлар бинога кирди, аммо депутатларга ўз фаолиятини амалга оширишга тўсқинлик қилмади.
Кечаси Сеулдаги кўча камерасидан олинган кадрлар.
Овоз беришдан кўп ўтмай, президент эрталаб ҳарбий ҳолатни бекор қилган ҳукумат йиғилишини чақирди. Кейин бутун президент аппаратини истеъфога чиқарди. Ушбу мақола ёзилаётган пайтда парламентга президент импичменти тўғрисидаги қонун лойиҳаси киритилган эди. Овоз бериш 6−7 декабрь кунлари бўлиб ўтади.
Давлат раҳбарининг конституциявий тартибни «Шимолий Корея коммунистик кучлари»дан ҳимоя қилиш баҳонасида қабул қилган кутилмаган қарори миллатни ҳайратда қолдирди ва у қонуний қабул қилинганми ёки йўқми деган кўплаб саволларни келтириб чиқарди. Сўнгги марта ҳарбий ҳолат 1979 йилда — Корея «иқтисодий мўъжизаси» меъморларидан бири ва оммавий қатағонлар ўтказилган диктатор, ўша пайтдаги президент Пак Чонхи ўлдирилганидан кейин эълон қилинган.
Маълумотларни назорат қилиш мумкин бўлган 45 йил олдинги воқеалардан фарқли ўлароқ, ҳозирги воқеалар реал вақт режимида ёритилди, деб ёзади Yonhap агентлиги. Нафақат журналистлар, балки юзлаб одамлар парламент олдидаги майдондан тўғридан-тўғри трансляцияларни олиб борди, сиёсатчилар эса оддий фуқаролар кириши қийин бўлган бинонинг ичкарисидан эшиттиришларни намойиш этди. Бутун Сеул бўйлаб ўрнатилган кўча кузатув камералари узлуксиз эфирга узатишни давом эттирди.
Сеул чоршанба куни эрталаб. Кўча камерасидан олинган тасвирлар.
«Айнан жамоатчилик тунда содир бўлган воқеаларни диққат билан кузатгани, таҳлилчиларнинг фикрига кўра, ҳарбий ҳолат жиддий можароларсиз бекор қилинишига ёрдам берди», — деб ёзади агентлик.
«Ҳарбий ҳолат тўғрисидаги қарор қанчалик пухта тайёрлангани ҳақида кўплаб саволлар мавжуд, аммо вазиятнинг тезда ҳал этилгани воқеаларни бутун миллат кузатгани билан боғлиқ бўлиши мумкин», — деди Сеул миллий университети социология профессори Ким Бэк-Ён.
Сеулдаги кўча камерасидан олинган тасвирлар.
Ўзбекистоннинг Сеулдаги элчихонаси бир кун аввал ватандошларни «шаклланаётган ички сиёсий вазиятни ҳисобга олган ҳолда» эҳтиёт бўлишга, одамлар гавжум жойларга бормасликка, турли митинг ва намойишларда қатнашмасликка чақирганди.
Ҳозир Корея Республикаси пойтахтида вазият тинч. Парламент биноси олдида намойиш давом этмоқда. Одамлар президентни истеъфога чиқишга чақирувчи плакатларни ушлаб турибди. Полиция намойишчиларга халақит бермасдан тартибни сақламоқда, дейди шаҳардаги «Газета.uz» суҳбатдошлари. Шу билан бирга, шаҳарда президентни қўллаб-қувватлашга қаратилган намойишлар ҳам бўлиб ўтмоқда. Қуйида Сеулдан олинган суратларни эълон қиламиз.
Суратлар
Корея Республикаси Миллий Ассамблеяси, унинг олдидан асосий воқеалар кечаси бўлиб ўтди.
Президентни импичмент қилишга чақирувчи плакат. Полиция намойишчиларга халал бергани йўқ.
Қўлида президентни истеъфога чақирувчи плакат кўтарилган аёл.
Намойиш иштирокчилари учун сув ва иссиқ овқат.
Журналистлар ишда.
Намойишда иштирок этиш учун ногиронлар аравачасидаги одамлар ҳам келди.
Телеканаллар бўлаётган воқеаларни жонли эфирда намойиш этишда давом этмоқда.
