Руминия Конституциявий суди 24 ноябрь куни бўлиб ўтган президент сайловининг биринчи тури натижаларини бекор қилди, дейилади суднинг 6 декабрь куни бўлиб ўтган мажлис якунлари бўйича баёнотида.
Суд бу қарорни «сайлов жараёнининг тўғрилиги ва қонунийлигини таъминлаш мақсадида» қабул қилганини тушунтирди. Сайлов жараёни «тўлиқ ҳажмда қайта тикланади». Янги сайлов санасини ҳукумат белгилаши керак. Бу қачон амалга оширилиши суд хабарида аниқлаштирилмаган.
Руминиядаги президентлик сайловларининг биринчи туриида илгари «Руминияликларни бирлаштириш учун альянс»нинг аъзоси бўлган мустақил номзод Кэлин Жеоржеску ғалаба қозонган. Сайлов бюллетенларини санаш натижаларига кўра, у 23 фоиз овоз олган. Иккинчи ўринни ўнг марказчи «Руминияни қутқариш иттифоқи» партияси етакчиси Елена Ласкони эгаллади, у 19% дан сал кўпроқ овоз тўплади.
Шундан сўнг Руминия махсус хизматлари Жеоржескунинг сайловолди ташвиқоти билан боғлиқ ҳужжатларни ошкор қилди, унда Руминия «Россиянинг тажовузкор ҳаракатлари» объектига айлангани ҳақида сўз боради. Ҳужжатда, шунингдек, TikTok`даги 25 минг бот-аккунт Жеоржеску фойдасига ташвиқот олиб борган бўлиши мумкинлиги айтилган.
Associated Press нашрининг ёзишича, Россия Жеоржескуни тарғиб қилиш учун «TikTok va Telegram каби платформаларда минглаб ижтимоий тармоқлардаги аккаунтларни ўз ичига олган кенг кўламли кампанияни» ўтказган. Жеоржескунинг ўзи Россия билан алоқани инкор этмоқда. Жеоржеску ва Ласкони иштирок этган иккинчи тур 8 декабрь куни бўлиб ўтиши керак эди.
У Европа Иттифоқи, НАТО ва АҚШнинг Украинага ҳарбий ёрдамини танқид қиларди, унинг ўзи эса Россия билан яхши алоқада экани учун танқидга қолган, деб ёзади BBC рус хизмати.
«Руминия давлати демократияни оёқости қилди», — деди Ласкони биринчи тур натижалари бекор қилинганидан сўнг.
Елена Ласкони.
Фото: inquam photos
«Биламан, мен ғалаба қозонган бўлардим ва ғалаба қозонаман, чунки румин халқи улар учун курашишимни, порлоқ Руминия учун бирлаштиришимни билади. Бугун содир бўлган воқеаларни қаттиқ қоралайман. Улар сўнгги 35 йил ичида катта қийинчилик билан эришилган ҳамма нарсани барбод қилди. Суд қарори ноқонунийдир ва демократиянинг моҳияти — овоз беришни парчалайди… Мен Путин сиёсий ҳокимият сайловларни қандай ўтказгани устидан кулаётганини биламан», — деди номзод.
Руминия президенти — давлат раҳбари ва мамлакат қуролли кучларининг бош қўмондони. У 5 йил муддатга сайланади ва миллий хавфсизлик ҳамда ташқи сиёсат масалаларида катта ваколатларга эга.
