Жанубий Корея парламенти президентга нисбатан импичмент масаласида овоз беришда етарлича овозни тўплай олмади, деб ёзмоқда Reuters.
Импичмент эълон қилиниши учун 300 депутатдан 200 нафари уни қўллаб-қувватлаши керак эди. Бироқ ҳукмрон «Халқ кучи» партиясидан 108 депутатдан 105 нафари мажлислар залидан чиқиб кетиб, овоз беришдан бош тортди.
Ўз навбатида, мухолифат вакиллари мамлакатда ҳарбий ҳолат эълон қилгани учун Юн Сок Ёлни жавобгарликка тортишга уринишларини тўхтатмаслигини маълум қилди.
Мажлис давомида парламент олдида президентга импичмент эълон қилиш ва уни ҳибсга олишни талаб қилган бир неча минг намойишчи тўпланган. Улар, BBC рус хизмати ёзганидек, мажлисни тарк этаётган ҳукмрон партиянинг депутатларини ғазабнок қичқириқлар билан кузатиб қўйди.
Мухолифат Юн Сок Ёлни импичмент бўйича овоз беришдан олдин истеъфога чиқишга чақирди, аммо Жанубий Корея президенти буни рад этди. 7 декабрь куни у миллатга мурожаат қилиб, ҳарбий ҳолат жорий этиш қарори учун мамлакат аҳолисидан узр сўраб, «чин кўнгилдан пушаймонлигини» айтди.
Мамлакатда 1989 йилдан бери биринчи марта ҳарбий ҳолат эълон қилинганди.
- 3 декабрь куни кечқурун президент Юн Сок Ёль Жанубий Кореяда ҳарбий ҳолат эълон қилганди. У буни конституциявий тартибни «коммунистик кучлар»дан ҳимоя қилиш зарурати билан изоҳлади. Унинг сўзларига кўра, у бундай чорани мамлакатни инқирозга олиб киришга уринаётган мухолифат ҳаракатлари туфайли қўллаган.
- Парламент депутатлари президент қарорига қарши чиқиб, уни бекор қилиш учун овоз берди, шундан сўнг президент ўз фармонини қайтариб олишга рози бўлди.
- 4 декабрь куни мухолифатдаги партиялар парламентга Юн Сок Ёль импичменти бўйича таклиф киритди. Президент импичменти учун парламент депутатларининг 2/3 қисми (жами 300 ўрин) овоз бериши керак.
- Шунингдек, Жанубий Корея полицияси Юн Сок Ёлни давлатга хиёнатда гумон қилиб, тергов бошлагани маълум бўлди.
