Жанубий Корея президенти Юн Сок Ёль ушбу ҳафта бошида ҳарбий ҳолат жорий этиш тўғрисидаги қарори учун узр сўради ва телевидение орқали халққа мурожаат чоғида таъзим қилди. Бу ҳақда Yonhap ёзмоқда.
«Бу қарор дилхунликдан қабул қилинган», — деди у. Президент унга қарши бўлга баъзилар хавотирга тушганидек, иккинчи марта ҳарбий ҳолат эълон қилмаслигини қўшимча қилди.
Юн Сок Ёль «лавозимида қолиш масаласини» ўз партияси ихтиёрига қолдиришини таъкидлади.
Миллатга мурожаат қилиш Юн Сок Ёлнинг биринчи марта ҳарбий ҳолат эълон қилганидан кейин ва парламент унинг фармонига қарши овоз бергани учун мамлакатда ҳарбий ҳолатни бекор қилганидан бери биринчи оммавий чиқиши бўлди. Шундан сўнг мамлакат парламентида кўпчиликни ташкил этган мухолифатдан сайланган депутатлар президентга импичмент тўғрисидаги қонун лойиҳасини киритди ва Жанубий Корея полицияси унга қарши тергов бошлади.
Юн Сок Ёлнинг миллатга мурожаатидан сўнг президентнинг «Халқ кучи» партияси етакчиси Хон Дон Хун Жанубий Корея раҳбарининг муддатидан олдин истеъфога чиқиши муқаррарлигини, чунки у энди давлат вазифаларини бажаришга қодир эмаслигини айтди.
Дон Хун, жумладан, президентнинг ваколатларини муддатидан олдин тўхтатиб қўйишга чақирди.
Бугун, 7 декабрь куни Жанубий Корея парламентида президент импичменти тўғрисидаги қонун лойиҳаси бўйича овоз бериш ўтказилади. Унинг қабул қилиниши учун мухолифатга президент партиясидан камида 8 нафар депутатнинг овози керак. Yonhap агентлиги бундан олдин парламент биринчи хонимга нисбатан тергов масаласи бўйича овоз беришини маълум қилганди.
- 3 декабрь куни кечқурун президент Юн Сок Ёль Жанубий Кореяда ҳарбий ҳолат эълон қилганди. У буни конституциявий тартибни «коммунистик кучлар»дан ҳимоя қилиш зарурати билан изоҳлади. Унинг сўзларига кўра, у бундай чорани мамлакатни инқирозга олиб киришга уринаётган мухолифат ҳаракатлари туфайли қўллаган.
- Парламент депутатлари президент қарорига қарши чиқиб, уни бекор қилиш учун овоз берди, шундан сўнг президент ўз фармонини қайтариб олишга рози бўлди.
- 4 декабрь куни мухолифатдаги партиялар парламентга Юн Сок Ёль импичменти бўйича таклиф киритди. Президент импичменти учун парламент депутатларининг 2/3 қисми (жами 300 ўрин) овоз бериши керак.
- Шунингдек, Жанубий Корея полицияси Юн Сок Ёлни давлатга хиёнатда гумон қилиб, тергов бошлагани маълум бўлди.
