Жанубий Кореянинг собиқ мудофаа вазири Ким Ён Хён 8 декабрь куни мамлакатда ҳарбий ҳолат жорий этишда иштирок этгани учун ҳибсга олинди, деб хабар берди Yonhap.
Собиқ вазир ўз ихтиёри билан Сеулнинг Марказий тумани прокуратурасига келиб, сўроқ қилинди. Қамоққа олингандан сўнг Ким Ён Хённинг телефони олиб қўйилди.
Жанубий Корея прокуратураси мамлакатда ҳарбий ҳолат жорий этилгани сабабли қўзғолон ва ҳокимиятни суиистеъмол қилиш билан боғлиқ иккита жиноят ишини тергов қилмоқда. Президент Юн Сок Ёль қўзғолонда гумон қилиняпти. Кеча Жанубий Корея парламенти президентга импичмент эълон қилиш учун овоз беришда етарлича овозни тўплай олмади: ҳукмрон партиянинг 108 депутатидан 105 нафари мажлислар залидан чиқиб кетиб, овоз беришдан бош тортди. Мухолифат президентни жавобгарликка тортишга уринишларини тўхтатмаслигини билдирди.
Ким Ён Хён 4 декабрь, чоршанба куни мудофаа вазири лавозимидан истеъфога чиққанди. Унинг айтишича, «у ҳарбий ҳолат жорий этилиши билан боғлиқ барча ҳодисалар учун жавобгарликни ўз зиммасига олган». Айнан мудофаа вазири президентга ҳарбий ҳолат жорий этишни таклиф қилган, деб ишонилади.
Аввалроқ «Газета.uz» ушбу мамлакатда яшовчи ўзбекистонликлар билан сиёсий воқеалар уларнинг ҳаётига қандай таъсир қилгани ҳақида суҳбатлашганди.
- 3 декабрь куни кечқурун президент Юн Сок Ёль Жанубий Кореяда ҳарбий ҳолат эълон қилганди. У буни конституциявий тартибни «коммунистик кучлар»дан ҳимоя қилиш зарурати билан изоҳлади. Унинг сўзларига кўра, у бундай чорани мамлакатни инқирозга олиб киришга уринаётган мухолифат ҳаракатлари туфайли қўллаган.
- Парламент депутатлари президент қарорига қарши чиқиб, уни бекор қилиш учун овоз берди, шундан сўнг президент ўз фармонини қайтариб олишга рози бўлди.
- 4 декабрь куни мухолифатдаги партиялар парламентга Юн Сок Ёль импичменти бўйича таклиф киритди. Президент импичменти учун парламент депутатларининг 2/3 қисми (жами 300 ўрин) овоз бериши керак.
- Шунингдек, Жанубий Корея полицияси Юн Сок Ёлни давлатга хиёнатда гумон қилиб, тергов бошлагани маълум бўлди.
