Жанубий Корея Адлия вазирлигининг хабар беришича, президент Юн Сок Ёлга мамлакатдан чиқиш тақиқланди, деб ёзмоқда Yonhap агентлиги.
Вазирликка Жанубий Кореянинг Коррупция бўйича тергов бошқармаси томонидан ариза билан мурожаат қилинди, деб ёзди Associated Press. Бошқарма бош прокурори О Дон Ун парламент эшитувларида яқинда фавқулодда ҳолат эълон қилингани муносабати билан терговчиларга президентнинг мамлакатдан чиқишини тақиқлаш бўйича кўрсатма берганини маълум қилди, аммо бу қарор ҳали кучга киргани йўқ.
Бундан ташқари, Юн Сок Ёль давлатга хиёнат ва ҳокимиятни суиистеъмол қилишда гумонланмоқда. Полиция уни сўроқ қилишни истисно қилмайди.
Бир кун аввал Жанубий Корея собиқ мудофаа вазири Ким Ёнг Хён тергов доирасида ҳибсга олинди. Прокуратура қўзғолон ва ҳокимиятни суиистеъмол қилиш билан боғлиқ иккита жиноят ишини тергов қилмоқда.
Аввалроқ «Газета.uz» ушбу мамлакатда яшовчи ўзбекистонликлар билан сиёсий воқеалар уларнинг ҳаётига қандай таъсир қилгани ҳақида суҳбатлашганди.
- 3 декабрь куни кечқурун президент Юн Сок Ёль Жанубий Кореяда ҳарбий ҳолат эълон қилганди. У буни конституциявий тартибни «коммунистик кучлар»дан ҳимоя қилиш зарурати билан изоҳлади. Унинг сўзларига кўра, у бундай чорани мамлакатни инқирозга олиб киришга уринаётган мухолифат ҳаракатлари туфайли қўллаган.
- Парламент депутатлари президент қарорига қарши чиқиб, уни бекор қилиш учун овоз берди, шундан сўнг президент ўз фармонини қайтариб олишга рози бўлди.
- 4 декабрь куни мухолифатдаги партиялар парламентга Юн Сок Ёль импичменти бўйича таклиф киритди. Президент импичменти учун парламент депутатларининг 2/3 қисми (жами 300 ўрин) овоз бериши керак.
- Шунингдек, Жанубий Корея полицияси Юн Сок Ёлни давлатга хиёнатда гумон қилиб, тергов бошлагани маълум бўлди.
