Жанубий Корея Миллий ассамблеяси (парламенти) ҳарбий ҳолат жорий этилиши муносабати билан президент Юн Сок Ёлга нисбатан тергов олиб бориш учун доимий махсус прокурор тайинлаш тўғрисидаги қонун лойиҳасини қабул қилди, деб хабар бермоқда Yonhap.
Ташаббусни 210 нафар депутат қўллаб-қувватлади, 63 нафари қарши чиқди, 14 нафари бетараф қолди. Тергов исёнчиликда айбланганларга тааллуқли.
Қонун лойиҳасида собиқ мудофаа вазири Ким Ён Хён ва армия штаб бошлиғи генерал Пак Ан Сун тилга олинган. Тергов қилиниши керак бўлган шахслар рўйхатига бош вазир Хан Док Су ва контрразведка қўмондони Ё Ин Хён ҳам киритилган.
Таъкидланишича, одатдаги махсус прокурор текширувидан фарқли ўлароқ, президент доимий махсус прокурор тайинлаш тўғрисидаги қонун лойиҳасига вето қўйиш ҳуқуқига эга эмас, аммо тайинлашнинг ўзини кечиктириши мумкин.
Бундан ташқари, парламент Юн Сок Ёл ва яна етти мансабдор шахсни тезроқ ҳибсга олишни талаб қилувчи резолюция қабул қилди. Унга 191 депутат овоз берди, 94 нафари қарши чиқди, уч нафари бетараф қолди.
Мухолифатдаги «Тобуро» демократик партияси ҳам Адлия вазири Пак Сон Же ва Миллий полиция агентлиги раҳбари Чо Чжи Хони импичмент қилиш жараёнини бошлашни режалаштираётганини эълон қилди. Таклиф шанба куни овозга қўйилади.
Бир кун аввал Жанубий Корея Адлия вазирлиги давлатга хиёнат жинояти бўйича тергов ўтказилаётган бир пайтда президентнинг мамлакатни тарк этишини тақиқлаганди. Шунингдек, у ўз ваколатини суиистеъмол қилиш бўйича гумон қилинувчи ҳамдир. Ишлар ҳарбий ҳолат жорий этилиши билан боғлиқ бўлиб, бир вақтнинг ўзида полиция, прокуратура ва коррупцияни тергов қилиш бошқармаси томонидан тергов қилинмоқда.
- 3 декабрь куни кечқурун президент Юн Сок Ёль Жанубий Кореяда ҳарбий ҳолат эълон қилганди. У буни конституциявий тартибни «коммунистик кучлар»дан ҳимоя қилиш зарурати билан изоҳлади. Унинг сўзларига кўра, у бундай чорани мамлакатни инқирозга олиб киришга уринаётган мухолифат ҳаракатлари туфайли қўллаган.
- Парламент депутатлари президент қарорига қарши чиқиб, уни бекор қилиш учун овоз берди, шундан сўнг президент ўз фармонини қайтариб олишга рози бўлди.
- 4 декабрь куни мухолифатдаги партиялар парламентга Юн Сок Ёль импичменти бўйича таклиф киритди. Президент импичменти учун парламент депутатларининг 2/3 қисми (жами 300 ўрин) овоз бериши керак.
- Шунингдек, Жанубий Корея полицияси Юн Сок Ёлни давлатга хиёнатда гумон қилиб, тергов бошлагани маълум бўлди.
