10 декабрь куни Жанубий Корея собиқ мудофаа вазири Ким Ёнг Хён ўзи ҳибсга олинган Сеулнинг шарқий қисмидаги Донгбу ҳибсхонасида жонига қасд қилишга уринди, дея маълум қилди Yonhap.
Муваффақиятсиз уринишдан сўнг Ким ҳимоя камерасида сақланмоқда ва унинг соғлиғи барқарорлигича қолмоқда, дея аниқлик киритди ахлоқ тузатиш маркази раҳбари.
Ким соат 23:52 да (Тошкент вақти билан 19:52) ҳаммом ичида кийимларини бир-бирига боғлаб, ўзини осмоқчи бўлганида бунинг олди олинди. «Тиббий жамоа томонидан даволаш ишлари олиб борилиши натижасида унинг аҳволи барқарор бўлиб, ҳеч қандай аномалиялар йўқлигини кўрсатди ва ҳозирда у нормал шароитда», — дейилади хабарда.
Собиқ мудофаа вазири Ким Ён Хён мамлакатда ҳарбий ҳолат жорий этишда иштирок этгани учун 8 декабрь куни ҳибсга олинганди. Унинг айтишича, «у ҳарбий ҳолат жорий этилиши билан боғлиқ барча ҳодисалар учун жавобгарликни ўз зиммасига олган». Айнан мудофаа вазири президентга ҳарбий ҳолат жорий этишни таклиф қилган, деб ишонилади.
Шу билан бирга, Жанубий Корея полицияси президент идорасида рейд уюштирди, деб тасдиқлади президент хавфсизлик хизмати ходими CNN телеканалига. Президент Юн Сук Ёлнинг ҳайратланарли, аммо қисқа муддатли ҳарбий ҳолат эълон қилгани мамлакатдаги кенг жамоатчиликнинг ғазабини қўзғатди.
Кеча Жанубий Корея парламенти президент Юн Сок Ёлга қарши айбловларни тергов қилиш учун махсус прокурор тайинлаш тўғрисидаги қонун лойиҳасини қабул қилганди.
- 3 декабрь куни кечқурун президент Юн Сок Ёль Жанубий Кореяда ҳарбий ҳолат эълон қилганди. У буни конституциявий тартибни «коммунистик кучлар»дан ҳимоя қилиш зарурати билан изоҳлади. Унинг сўзларига кўра, у бундай чорани мамлакатни инқирозга олиб киришга уринаётган мухолифат ҳаракатлари туфайли қўллаган.
- Парламент депутатлари президент қарорига қарши чиқиб, уни бекор қилиш учун овоз берди, шундан сўнг президент ўз фармонини қайтариб олишга рози бўлди.
- 4 декабрь куни мухолифатдаги партиялар парламентга Юн Сок Ёль импичменти бўйича таклиф киритди. Президент импичменти учун парламент депутатларининг 2/3 қисми (жами 300 ўрин) овоз бериши керак.
- Шунингдек, Жанубий Корея полицияси Юн Сок Ёлни давлатга хиёнатда гумон қилиб, тергов бошлагани маълум бўлди. Кейинчалик президентга мамлакатдан чиқиш тақиқланди.
