Ўзбекистон ўсимлик мойи экспортига рухсат бериши мумкин. Бу ҳақда 10 декабрь куни озиқ-овқат саноатидаги ишлар ва 2025 йилга мўлжалланган режалар билан танишган президент билан учрашувда сўз борди.
Давлат раҳбари матбуот хизматининг маълум қилишича, ёғ-мой саноатида 408 та корхона очилган, бироқ «юртимизда хомашё камлиги учун улар ҳар доим ҳам тўла қувватда ишламаяпти».
«Ёғ-мой экспортига рухсат берилса, ишлаб чиқариш 120 минг тоннага ошиб, 240 минг тонна озуқа ем тайёрланиши ҳисоб-китоб қилинган», — дейилади хабарда.
Бош вазир ўринбосарига бозор талабларидан келиб чиқиб, бу борада таклиф киритиш топширилди.
Эслатиб ўтамиз, Ўзбекистонда 2022 йил 1 июндан бошлаб кунгабоқар ва ўсимлик ёғи, шунингдек, кунгабоқар уруғлари ва бошқа мойли ўсимликлар экспортига чекловлар жорий этилган. Жорий йилнинг март ойида ҳукумат кунгабоқар ва ўсимлик ёғи экспортига қўйилган тақиқни юмшатган эди. Корхоналарга импорт мой ва уруғларни қайта ишлашдан олинган маҳсулотларнинг бир қисмини хорижга етказиб беришга рухсат берилган.
Ойбек Зуфаров. Фото: «Ўзбекистон 24».
«Ўзёғмойсаноат» уюшмаси раиси Ойбек Зуфаров «Ўзбекистон 24» телеканалига берган интервьюсида ёғ-мой саноатида «яширин иқтисодиёт» ўсиб бораётгани, ноқонуний фаолият юритаётган кичик цехлар кўпайганини таъкидлади. «Уларнинг ишини тартибга солиш, қонунийлаштириш масаласи кўриб чиқилди», — деди у.
Тадбирда гўшт маҳсулотларини минтақа давлатлари ва араб давлатларига фаол экспорт қилаётган ҳалол сертификатига эга миллий брендлар сонининг кўпайиши ҳақида ҳам сўз борди.
«Лекин бизда колбаса маҳсулотларини сақлашнинг стандарт муддати 3 ой этиб белгиланган. Хориждаги истеъмолчига етиб боргунча 2 ой кетяпти. Гўшт маҳсулотини сақлаш муддати Европа стандарти каби 4−12 ойга оширилса, ишлаб чиқариш ва экспорт ҳажмини 2 карра кўпайтириш имконияти очилади. Шунинг учун бу борадаги стандартларни халқаро стандартларга мослаштириш вазифаси қўйилди», — дейилади президент матбуот хизмати хабарида.
Ҳуқуқшунос Умида Хакназар «Газета.уз»нинг май ойидаги колонкасида (материал рус тилида) Ўзбекистонда озиқ-овқат хавфсизлигини бошқаришнинг бутун тизими якуний маҳсулотларга сертификатлар беришдан иборат экани, бу халқаро стандартларга зид бўлган эскирган ёндашувлигини таъкидлаган эди. Унинг фикрича, экспортни кенгайтириш ва аҳоли саломатлигини етарли даражада ҳимоя қилиш мумкин эмас.
