6 декабрь куни Вазирлар Маҳкамасининг «Ўзбекистон Республикасидаги санитария ва фитосанитария шартлари тўғрисида Жаҳон савдо ташкилоти аъзо давлатларини хабардор қилиш тартибини жорий этиш чора-тадбирлари тўғрисида»ги қарори қабул қилинди.

Санитария-эпидемиологик осойишталик ва жамоат саломатлиги қўмитасига қўшимча вазифалар юкланди:

  • озиқ-овқат маҳсулотлари хавфсизлигини таъминлаш учун қабул қилинган норматив-ҳуқуқий ҳужжатлар, қоидалар, низомлар тўғрисида ЖСТ аъзо давлатларини мунтазам хабардор қилишни таъминлаш;
  • санитария ва фитосанитария чора-тадбирлари тўғрисидаги лойиҳаларни эътироз ва таклифлар олиш учун ЖСТ аъзо давлатларига юбориш;
  • ЖСТ аъзо давлатларининг эътироз ёки таклифлари ва қаршиликлари асосида чора-тадбирлар лойиҳаларини қайта ишлаш учун ташаббускор ваколатли давлат органларига киритиш;
  • ЖСТ аъзо давлатлари ва манфаатдор томонларнинг асосланган сўровларига жавоблар юбориш.

Президентнинг 3 июндаги фармонига мувофиқ, Жаҳон савдо ташкилотининг Санитария ва фитосанитария чора-тадбирлари тўғрисидаги битими (SPS Agreement) талабларидан келиб чиққан ҳолда Соғлиқни сақлаш вазирлиги ҳузуридаги Санитария-эпидемиологик осойишталик ва жамоат саломатлиги қўмитасининг марказий аппаратида 3 та штат бирлигидан иборат Санитария ва фитосанитария чора-тадбирлари бўйича Ахборот маркази ташкил этилди.

Соғлиқни сақлаш вазирлиги:

  • икки ҳафта муддатда Ахборот маркази тўғрисидаги низомини ишлаб чиқсин ва тасдиқлайди;
  • икки ой муддатда манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни ушбу қарорга мувофиқлаштиради.

Ҳукумат қарори билан ССВ ва Санитария-эпидемиология қўмитасининг Кодекс Алиментариус миллий комиссияси тўғрисидаги низом тасдиқланди. Комиссия ЖСТга аъзо бўлиш бўйича СФС чораларини Кодекс Алиментариус стандартлари талабларига мослаштириш ишларини мувофиқлаштирувчи коллегиал орган этиб белгиланди.