Олий Мажлиси Сенатининг кенгаши президент тақдимномасига мувофиқ Ўзбекистон Марказий банки бошқаруви раиси лавозимига Тимур Ишметовни тайинлаш тўғрисида қарор қабул қилди. Бу ҳақда юқори палата матбуот хизмати хабар берди.
Аввалроқ Мамаризо Нурмуратов МБ бошқаруви раиси лавозимидан озод этилгани хабар қилинганди.
Эслатиб ўтамиз, 2022 йилнинг 30 декабрь куни президентнинг тегишли фармони билан Тимур Ишметов молия вазири лавозимидан озод этилганди. Ўшанда буён у давлат раҳбарининг иқтисодиёт соҳаларини ривожлантириш, инвестиция ва ташқи савдо сиёсатини амалга ошириш масалалари бўйича маслаҳатчисининг биринчи ўринбосари лавозимида ишлаб келаётганди.
Тимур Аминжанович Ишметов (1979 йилда туғилган) бакалавриатни Тошкент молия институтининг молия-кредит факультетида (2000), магистратурани эса Бирмингем университетининг International Money and Banking йўналишида тамомлаган (2005). Шунингдек, Ишметов Тошкент давлат юридик университетининг ҳуқуқшунослик факультетини тамомлаган (2007).
Меҳнат фаолиятини 2000 йилда Марказий банкда иқтисодчи сифатида бошлаган, у ерда турли лавозимларда, жумладан, Монетар операциялар департаменти, Халқаро заҳираларни бошқариш департаменти, Ички валюта бозори операциялари департаменти ҳамда валютани тартибга солиш ва назорат департаменти бошлиғи лавозимларида ишлаган. 2017−2019 йилларда Марказий банк раисининг биринчи ўринбосари лавозимида ишлаган. 2019 йил май ойидан 2020 йил февралида вазир этиб тайинлангунича Молия вазирининг биринчи ўринбосари лавозимида ишлаб келган.
«Марказий банк тўғрисида»ги қонунга мувофиқ Марказий банк бошқаруви тўққиз кишидан: раис, унинг биринчи ўринбосари ва ўринбосарлари, шунингдек, бошқарувнинг икки нафар мустақил аъзосидан иборат. Марказий банк бошқаруви раиси президентнинг тақдимига биноан Сенат томонидан лавозимга тайинланади ва лавозимидан озод этилади.
