Таиландда ўтган бокс бўйича Осиё чемпионатида ўзбекистонлик спортчилар 11 та олтин медални қўлга киритганди. Бироқ чемпионлар сафида бўлган Хавасбек Асадуллаев финалдаги жангида қилган қоидабузарлиги учун дисквалификация қилинди. Бу ҳақда 13 декабрь куни Осиё бокс конфедерацияси хабар берди.
11 декабрь куни енгил ўрта вазн тоифасидаги (71 кг) финал баҳсида Хавасбек Асадуллаев қозоғистонлик рақиби Аблайхон Жусуповга қарши жанг қилганди. Маълум бўлишича, Асадуллаев IBA ўйин қоидаларининг 21.1.8 банди бўйича таснифланган ҳарaкат, яъни рақибни тишлагани ҳакам томонидан эътибордан четда қолган. Қозоғистон бокс федерацияси Осиё чемпионатига бу ҳақда норозилик хати юбориб, қоидабузарликни исботловчи сурат ва видеолар борлигини маълум қилган.
Қозоғистон бокс федерацияси юборган норозиликдан сўнг бокс чемпионатининг техник вакили, ирландиялик Сади Даффи андижонлик Хавасбек Асадуллаевни жангдаги жиддий қоидабузарлиги учун дисквалификация қилиш тўғрисида қарор қабул қилди.
Бокс қоидаларининг 19.8.1 бандида келтирилишича, агар боксчи бирор сабабга кўра дисквалификация қилинган бўлса, унинг рақиби жанг ғолиби деб эълон қилинади.
Шунга кўра, конфедерация муваққат президенти Азиз Кожамбетов ўзбекистонлик спортчининг дисквалификация қилинганидан кейин қозоғистонлик Аблайхон Жуссуповни 71 кг вазн тоифасида ғолиб эканини эълон қилди.
Бунинг ортидан Ўзбекистон терма жамоасининг Осиё чемпионатида қўлга киритган олтин медаллари сони биттага камайди.
