Президент Эммануэль Макрон Франциянинг янги бош вазири этиб собиқ адлия вазири, марказчи «Демократик ҳаракат» партияси етакчиси Франсуа Байруни тайинлади. Бу ҳақда Le Monde хабар бермоқда.
BBC 73 ёшли Байруни «тажрибали сиёсатчи, кўплаб тарихий китоблар муаллифи ва Макроннинг тарафдори» деб таърифлади.
Нашрнинг қайд этишича, у Макрон 2022 йил баҳорида иккинчи муддатга қайта сайланганидан бери тўртинчи бош вазирдир. Аввалги бош вазир Мишель Барнье ўз лавозимида уч ойдан камроқ ишлаган.
5 декабрь куни Эммануэль Макрон «яқин кунларда» янги бош вазир тайинлашни ваъда қилганди. Шу билан бирга, ўзининг истеъфога чиқишини истисно этган ва сиёсий инқироз учун айбни ўта ўнг ҳамда сўл партияларга тўнкаган.
Франциядаги сиёсий инқироз ёздан бери давом этмоқда, чунки навбатдан ташқари сайловлар натижасида на сўл кучлар блоки, на Макрон бошчилигидаги марказчилар, на Марин Ле Пен бошчилигидаги ўнглар парламентда кўпчиликни қўлга кирита олмаган.
Янги бош вазирнинг биринчи галдаги вазифаси 2025 йил учун бюджетни чуқур тарқоқликка учраган Миллий мажлисда маъқуллатишга эришишдан иборат. Француз матбуотининг ёзишича, янги ҳукумат учун ўнглар ва сўллар ўртасида мувозанатни сақлаш жуда қийин бўлади.
- 4 декабрь куни Франция Миллий мажлиси (парламент қуйи палатаси) 1962 йилдан бери биринчи марта бош вазир ҳукуматига ишончсизлик вотуми учун овоз берди. У ўз лавозимида бор-йўғи уч ой ишлади.
- Овозга ишончсизлик вотуми масаласини сўл «Янги халқ фронти» коалицияси ва ўта ўнг «Миллий бирлашув» партияси олиб чиқди. Барньенинг парламент билан келишмасдан 2025 йил учун ижтимоий суғурта бюджетини тасдиқлаш қарори бунга сабаб бўлди. Бунинг учун у Конституциянинг 49.3-моддасини қўллади, бу қонунни парламентни четлаб ўтишга имкон беради, лекин ҳукумат ишончсизлик вотумига бардош бера олсагина.
- Макрон 5 сентябрь куни 73 ёшли Барньени мамлакат бош вазири лавозимига тайинлаганди. Бундан икки ой олдин Францияда навбатдан ташқари парламент сайловлари бўлиб ўтган. Уларда биринчи ўринни «Янги халқ фронти» сўл партиялар коалицияси эгаллаган, у Миллий мажлисда 577 ўриндан 82 ўринни олган. Иккинчи ўринни Макроннинг «Биргаликда» марказчилар коалицияси эгаллаган. Марин Ле Пен бошчилигидаги «Миллий бирлашув» бошчилигидаги ўта ўнг партиялар коалицияси 143 та ўринни қўлга киритган.
