Ўзбекистон ёшлар терма жамоаси ва «Локомотив» клуби футболчиси Лазизбек Мирзаев Испаниянинг «Леганес» клубига ўтди. Бу ҳақда ўзбек клуби матбуот хизмати хабар берди.
Спортчининг «Локомотив» билан амалдаги шартномаси 2025 йилнинг 31 декабрига қадар тузилган. Хабарда хориж клуби билан шартнома тафсилотлари келтирилмаган. Шунингдек, 18 ёшли ярим ҳимоячи «Леганес»нинг асосий жамоасида ёки ёшлар жамоасида ўйнаши ҳам номаълум.
Лазизбек Мирзаев 2023 йилги ёшлар ўртасидаги жаҳон чемпионатида Ўзбекистон U-17 терма жамоаси сардори бўлган эди. У 1/8 финалда Англияга қарши ўйинда (2:1) жарима зарбасидан гол урган. Ёшлар терма жамоаси ўша турнирни чорак финалда Францияга ютқазиб, мусобақани якунлаган.
17 ёшгача бўлган футболчилар ўртасидаги жаҳон чемпионатидаги муваффақиятли иштирокидан сўнг Мирзаев кўплаб скаутлар эътиборини тортди. Унинг трансфер қиймати бугунги кунда 350 минг еврога баҳоланмоқда.
Июнь ойида футболчи Championat.asia нашрига берган интервьюсида турнирдан сўнг унга «Леганес»дан қизиқиш билдирилгани, кейинчалик клуб билан шартнома имзолагани ҳақида хабар берган.
2024 йилги Ўзбекистон чемпионатида у 14 та ўйин, жумладан 8 тасини стартда ўтказиб, 1 та голли узатмани амалга оширган. Шу билан бирга, уч марта Ўзбекистон чемпиони бўлган Тошкент клуби мавсум якунида Суперлигадан Про-лигага тушиб кетган.
«Леганес» — Мадрид чеккасидаги худди шу номдаги шаҳарнинг футбол клуби. У 1928 йилда ташкил этилган. Ўтган мавсумда клуб Ла Лига (Испания биринчи дивизиони) йўлланмасини қўлга киритган ва ҳозирда у ерда 16 учрашувдан сўнг 17-ўринни эгаллаб турибди (3 та ғалаба, 6 та дуранг ва 7 мағлубият).
