14 декабр куни президент ҳузуридаги Стратегик ислоҳотлар агентлигида (ACP) тунги иқтисодиётни ривожлантириш ва уни амалга ошириш бўйича таклифлар ишлаб чиқиш масалалари муҳокама қилинди, деб хабар берди агентлик.
Йиғилиш аввалида иқтисодий ўсишни рағбатлантириш, иш ўринлари яратиш ва туризм жозибадорлигини оширишда тунги иқтисодиётнинг аҳамияти таъкидланди. Қайд этилишича, АҚШ, Австралия, Буюк Британия ва Туркияда 24/7 ишлаётган кўчалар қўшимча сайёҳлар оқимини жалб этиб, маҳаллий бизнесни жонлантирган.
Иқтисодиёт ва молия вазирлиги вакили тунги иш учун ягона стандартлар ва талабларни ишлаб чиқишни таклиф қилди. Ички ишлар вазирлиги, ўз навбатида, тунги иқтисодиёт масалаларини назорат қилувчи алоҳида орган ташкил этиш зарурлигини таъкидлади.
Савдо-саноат палатаси ва Рақамли технологиялар вазирлиги вакиллари тунги иқтисодиётни ривожлантириш учун ихтисослаштирилган ҳудуд ажратиш имкониятини кўриб чиқишни таклиф қилди. Уларнинг фикрича, бу қулай инфратузилмани яратиш, барқарор рақамли хизматларни таъминлаш ҳамда хавфсизлик, хизматлар учун тўлов ва ташриф буюрувчилар оқимини бошқариш каби жараёнларни назорат қилиш ва мониторинг қилиш учун замонавий технологияларни жорий этиш имконини беради.
Йиғилиш якунлари бўйича иштирокчилар тунги иқтисодиётни ривожлантириш бўйича аниқ таклифлар ишлаб чиқиш бўйича топшириқлар олди. Улар асосида Тунги иқтисодиётни ривожлантириш концепцияси ва президент қарори лойиҳаси ишлаб чиқилади.
Ноябрь ойида ACP тунги иқтисодиётни ривожлантириш бўйича таклифларини эълон қилганди. Кўнгилочар муассасаларнинг жума ва шанба кунлари туну-кун ишлашига рухсат бериш, иш вақти бўйича чекловларни олиб ташлаш, сайёҳлар учун жозибадор жойларда тунги машғулотлар учун жойлар яратиш таклиф этилган.
2022 йил апрель ойида Шавкат Мирзиёев ички туризмни ривожлантириш тўғрисидаги қарорни имзолаган, унда «сайёҳлик кўчалари» ташкил этиш назарда тутилган эди. У ерда жойлашган умумий овқатланиш, савдо, маданият ва кўнгилочар муассасаларга тунги вақтда ишлашга рухсат берилган.
