16 декабрь куни Европа Иттифоқи Россияга нисбатан Украинага бостириб кириши муносабати билан иқтисодий ва индивидуал санкцияларнинг 15-пакетини қабул қилди, деб хабар берилди ЕИ кенгаши сайтида.
Санкция рўйхатига 54 та жисмоний ва 30 та юридик шахс киритилган. Улар орасида Киевдаги «Охматдет» болалар касалхонасига берилган зарбада жввобгар бўлган ҳарбий бўлинма, энергетика компаниялари раҳбарлари, Украинадан болаларни депортация қилиш, ҳарбий тарғибот ва санкцияларни четлаб ўтишда айбланган масъул шахслар, шунингдек, КХДРнинг икки юқори мартабали амалдори бор.
Бундан ташқари, Россиянинг соядаги флоти билан боғлиқ бўлган Россия мудофаа корхоналари ва кемачилик компаниялари санкцияларга учради. Россия нефти, Россия учун ҳарбий техника ёки ўғирланган Украина донини ташиётган учинчи мамлакатлардан келган 52 та танкерга Европа Иттифоқи портларига кириш чекланди.
ЕИ, шунингдек, Россия ҳарбий-саноат комплексига санкцияларни четлаб ўтишда ёрдам берадиган компаниялар рўйхатини кенгайтирди ва унга Хитой, Ҳиндистон, Эрон, Сербия ва БААдан 32 та янги ташкилот қўшди. Бу фирмаларга икки хил мақсаддаги товарларни экспорт қилиш чекланади.
Россия Украинага қарши урушда фойдаланаётган дронлар ва микроэлектроника учун бутловчи қисмларни етказиб берувчи Хитой компанияларига қарши биринчи марта тўлиқ санкциялар жорий этилди.
- Европа Иттифоқининг Россияга қарши санкцияларининг 14-пакети жорий йилнинг июнь ойида қабул қилинган эди. У Россия энергетика секторига таъсир қилди ва Хитой, Туркия ва Ҳиндистон каби учинчи мамлакатлардаги ўнлаб компаниялар билан савдони чеклади.
