16 декабрь куни физика-математика фанлари доктори, сенатор Шавкат Абдуллаевич Аюпов Ўзбекистон Фанлар академияси президенти этиб сайланди, дея хабар бермоқда ЎзА.
Шавкат Аюпов 1952 йилда Тошкент шаҳрида туғилган. У Тошкент давлат университети (ЎзМУ)нинг математика факультетини тугатган. Сўнгра Тошкент давлат университетида ўқитувчи, 1977−1997 йилларда Фанлар академиясининг Математика институтида катта илмий ходим, алгебра ва анализ бўлими мудири, сўнгра директори бўлиб ишлаган.
Аюпов 1997—2003 йилларда Олий аттестация комиссияси раиси лавозимида фаолият юритган. 1980 йилда Америка математика жамияти аъзоси, 1995 йилда академия ҳақиқий аъзоси (академик) этиб сайланган.
У 1996 йилда «Шуҳрат» медали, 2003 йилда «Меҳнат шуҳрати» ордени, 2011 йилда «Ўзбекистон Республикаси фан арбоби» фахрий унвони ва 2021 йилда «Ўзбекистон Қаҳрамони» унвони ҳамда «Олтин юлдуз» медали билан тақдирланган.
Бунга қадар Шавкат Аюпов Фанлар академиясининг Математика институти директори бўлиб ишлаган.
Эслатиб ўтамиз, академиянинг аввалги президенти, физик олим, профессор Беҳзод Йўлдошев август ойида 79 ёшида вафот этганди. У ташкилотга 2017 йилдан буён раҳбарлик қилиб келаётганди.
