Жанубий Корея Конституциявий суди 16 декабрь куни президент Юн Сок Ёлга қарши 3 декабрь куни ҳарбий ҳолат жорий этишга уриниш юзасидан импичмент ишини кўриб чиқишни бошлади, деб хабар берди Yonhap.
Биринчи оммавий эшитув 27 декабрь куни бўлиб ўтади. Бу «тайёргарлик» бўлади: судьялар ишнинг асосий ҳуқуқий масалаларини ва ишни кўриб чиқиш жадвалини тасдиқлайди.
Конституциявий суд 180 кун ичида президентни лавозимидан четлаштириш ёки қайта тиклаш тўғрисида қарор қабул қилиши керак. Импичментни тасдиқлаш учун барча олти судьянинг розилиги талаб қилинади.
Агар суд президентни лавозимидан четлатса, 60 кун ичида муддатидан олдин президентлик сайловлари ўтказилиши керак.
Юн Сок Ёль ва бир қатор юқори мартабали амалдорлар ҳарбий ҳолат жорий этилгани сабабли исён кўтариш ва мансаб ваколатларини суиистеъмол қилишда ҳам айбланиши мумкин. Полиция, Коррупцияга қарши кураш бошқармаси (CIO) ва Мудофаа вазирлигининг тергов бўлими биргаликда президентни сўроққа чақирди.
Жанубий Кореянинг ҳукмрон Халқ кучи партияси раҳбари Хан Дон Хун ҳам душанба куни ўз лавозимидан истеъфога чиқишини эълон қилди. Партия Олий кенгашининг беш нафар сайланган аъзоси ҳам истеъфога чиқиш ниятини маълум қилди.
14 декабрь куни Жанубий Корея парламенти иккинчи уринишда Юн Сок Ёлга импичментни қўллаб-қувватлади. Уни 204 депутат маъқуллади, 85 нафари қарши, 3 нафари бетараф бўлса, яна тўрт овоз ҳақиқий эмас, деб топилди.
Президентнинг ваколатлари зудлик билан тўхтатилди ва бош вазир Хан Дак Су давлат раҳбари вазифасини бажарувчи бўлди.
- 3 декабрь куни кечқурун президент Юн Сок Ёль Жанубий Кореяда ҳарбий ҳолат эълон қилганди. У буни конституциявий тартибни «коммунистик кучлар»дан ҳимоя қилиш зарурати билан изоҳлади. Унинг сўзларига кўра, у бундай чорани мамлакатни инқирозга олиб киришга уринаётган мухолифат ҳаракатлари туфайли қўллаган.
- Парламент қарорни блоклади ва президент уни бекор қилишга мажбур бўлди. Шундан сўнг Мудофаа вазирлиги раҳбари Ким Ён Хён истеъфога чиқди, президент, собиқ вазир ва бошқа бир қатор амалдорларга нисбатан тергов бошланди. Улар исён, давлатга хиёнат ва ҳокимиятни суиисте’мол қилишда гумон қилинмоқда.
- 12 декабрь куни телемурожаатида Юн ҳарбий ҳолат жорий этиш қарори «давлат ишларини нормаллаштириш» учун тўғри ва зарур бўлганини айтди. У исён кўтаришда айбланиш ва истеъфога чиқишга даъватларни рад этиб, охиригача курашишга ваъда берди.
- Жанубий Кореяда президент импичмент орқали охирги марта 2016 йилда четлатилган эди. Гап Пак Кин Хе ҳақида бормоқда. Унинг импичментига коррупция можароси сабаб бўлган, терговни эса ўша вақтда прокурор лавозимидаги Юн Сок Ёль олиб борган.
